Formúla 1

Verstappen gefur lítið fyrir baulið á Silverstone

Árni Jóhansson skrifar
Max Verstappen heyrði baulið en gaf lítið fyrir það
Max Verstappen heyrði baulið en gaf lítið fyrir það GETTY IMAGES

Max Verstappen verður á öðrum ráspól í Breska kappakstrinum sem fram fer í dag. Í viðtali eftir tímatökuna í gær var mikið baulað á kappann af áhorfendum en hann og Lewis Hamilton, uppáhald heimamanna, tókust harkalega á um heimsmeistaratitil ökuþóra í fyrra.

Á síðasta keppnistímabili þegar Breski kappaksturinn fór fram lentu Verstappen og Hamilton í árekstri sem varð til þess að sá fyrrnefndi þurfti að hætta og leiddi til sigurs Hamilton. Tímabilið endaði svo með miklum látum þegar gerðar voru breytingar á því hvernig öryggisbíllinn verkaði sem gerði það að verkum að Verstappen lyfti heimsmeistaratitli ökuþóra. Stuðningsmenn Hamilton muna eftir því og eru enn súrir með það og létu tilfinningar sínar í ljós með bauli eins og áður segir.

Verstappen telur að ekkert sé við því að gera að fólk bauli á sig en að væru vonbrigði vegna þess að það væri erfitt að heyra spurningarnar. 

„Ef þau vilja baula þá gera þau það. Það breytir engu fyrir mig. Ég er alltaf glaður að vera hérna þar sem þetta er frábær braut og frábært andrúmsloft. Mögulega líkar fólki ekki við mig og það er allt í lagi. Það hafa allir sína skoðun og mér er alveg sama.“

Baulað var á Hamilton af stuðningsmönnum Verstappen í Ungverjalandi en Verstappen telur það ekki vera sitt hlutverk að segja aðdáendum sínum hvernig þeir eigi að haga sér. Hann væri þó ekki sammála því að það ætti að baula. Mikið var fagnað þegar Verstappen sneri bílnum sínum í lokahluta tímatökunnar í gær.

Í gær sagði Hamilton: „Við þurfum ekki á þessu að halda því við ættum öll að vera hérna til að hvetja hvern annan áfram og þrýsta á hvern annan til að gera vel. Ég er samt ánægður með stuðninginn og mögulega eru einhverjir þarna úti sem eru enn súrir eftir síðasta tímabil.“

Liðstjóri Mercedes var ekki ánægður með baulið og sagði það vera óíþróttamannslegt.

„Mér finnst þetta vera óíþróttamannslegt. Það er augljóst að við elskum stuðninginn sem við fáum en ef þér líkar ekki við hina ökumennina hafðu þá bara hljóð. Ég held að það væri best. Ég er á þeirri skoðun að enginn ökumaður eigi skilið  að fá baulið og það er alveg sama hvað gerðist á síðasta tímabili og hver sem keppnin er.“


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.