Gréta og Svala kynntust fyrst þegar þær voru búsettar í Los Angeles og lágu leiðir þeirra saman í gegnum tónlistarheiminn.
Límdar saman frá fyrstu kynnum
„Hún bauð mér á tónleika hjá sér og í lok tónleikanna labbaði hún beint niður af sviðinu til mín og við höfum eiginlega verið límdar saman síðan,“ segir Gréta en hún og Svala komust fljótt að því að þær áttu eitt og annað sameiginlegt.
„Já, listinn er langur. Við erum báðar hugfangnar af tónlist, tísku, heimildarmyndum og svo lengi mætti telja. Reyndar erum við með andstæðan smekk þegar kemur að karlmönnum,“ segir Gréta og hlær.
Það er kannski bara frábært, þá þurfum við allavega ekki að úllen, dúllen doffa þegar kemur að karlmönnum!
Gréta segist strax hafa tekið eftir því hvað Svala væri valdeflandi og hvetjandi og sá eiginleiki hafi strax heillað hana.
Það er engin afbrýðisemi eða neitt svoleiðis, sem vill stundum verða á milli kvenna, og ég elska það því ég er þannig líka. Við eigum að styðja hver aðra en ekki draga niður. Þetta er enginn keppni og við erum allar einstakar. Það er engin eins og þú!
Kalla sig systur
Gréta segir þær vinkonur hafa gengið í gegnum margt saman í lífinu, góða og erfiða tíma og alltaf staðið þétt við bakið á hvor annarri.
Vinskapurinn okkar er eiginlega meira eins og fjölskyldutengsl, enda köllum við okkur systur.
Þrátt fyrir náinn vinskap segjast þær hafa uppgötvað um daginn að þær hafi ekki átt margar myndir af sér saman svo upp hafi komið sú hugmynd að fara saman í skemmtilega myndatöku.
„Átta ára vinskapur og næstum engar myndir! Ég hélt nú ekki...“
Ekki auglýsing fyrir Adam og Evu
Gréta segist þá hafa heyrt í vini sínum Arnóri Trausta ljósmyndara og ákveðið dagsetningu fyrir myndatökuna.
Myndatakan vakti strax mikla athygli og segir Gréta að þær séu mjög ánægðar með útkomuna og gefi lítið fyrir gagnrýnisraddir.
Þegar kom að því að velja dress fyrir myndatökuna segir Gréta að hún hafi sjálf hrifist af toppum og korsilettum úr Adam og Evu sem hafi orðið fyrir valinu ásamt klassískari fatnaði.
Gréta segir myndatökuna alls ekki hafa verið auglýsingu fyrir Adam og Evu heldur hafi fatnaður þaðan einfaldlega passað við stemmninguna í myndatökunni.
Fyrir okkur snýst þessi myndataka um valdeflningu kvenna. Minn líkami - Mitt val! Að elska sjálfa sig og aðrar konur.
Stefna að því að halda sameiginlega tónleika
Aðspurð hvort að það sé á döfinni að gefa út tónlist saman svarar Gréta því til að það sé í rauninni kómískt að það hafi aldrei borið á góma þar sem tónlist sé starf og árstríða þeirra beggja.
„Það er svo fyndið að þegar við erum saman þá tölum við yfirleitt bara um lífið og tilveruna en ekki vinnuna en nýverið þá var tekin sú ákvörðun að stefna að því að halda tónleika saman.“
