Handbolti

Benedikt tryggði íslensku strákunum sigur þegar leiktíminn var búinn

Hjörtur Leó Guðjónsson skrifar
Íslensku strákarnir í U20 ára landsliðinu í handbolta hafa leikið tvo háspennuleiki á Skandinavíumótinu.
Íslensku strákarnir í U20 ára landsliðinu í handbolta hafa leikið tvo háspennuleiki á Skandinavíumótinu. HSÍ

Benedikt Gunnar Óskarsson reyndist hetja íslenska U20 ára landsliðs karla í handbolta þegar hann tryggði liðinu eins marks sigur, 25-24, gegn Norðmönnum úr vítakasti þegar leiktíminn var runninn út.

Þetta var því annar leikurinn í röð þar sem íslensku strákarnir bjarga sér fyrir horn, en Þorsteinn Leó Gunnarsson var hetja liðsins í gær þegar hann jafnaði metin gegn Svíum.

Íslensku strákarnir taka um þessar mundir þátt í Skandinavíumótinu sem er liður í undirbúningi liðsins fyrir EM í Portúgal sem hefst þann 7. júlí.

Leikur dagsins var jafn og spennandi frá upphafi til enda og íslenska liðið leiddi með einu marki þegar flautað var til hálfleiks, staðan 13-12.

Enn var jafnt á öllum tölum þegar komið var fram á lokamínútuna, en Anton Már Rúnarsson jafnaði metin í 24-24 þegar 59 sekúndur voru til leiksloka. Íslenska vörnin stóð seinustu sókn Norðmanna af sér og Anton Már fiskaði víti á hinum enda vallarins. Benedikt Gunnar fór á vítalínuna þegar leiktíminn var liðinn og tryggði íslensku strákunum nauman sigur.

Íslensku strákarnir hafa nú unnið einn leik og gert eitt jafntefli, en seinasti leikur liðsins er gegn Dönum á morgun.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.