Erlent

Vilja að Maxwell verði dæmd í að minnsta kosti 30 ára fangelsi

Hólmfríður Gísladóttir skrifar
Maxwell fór huldu höfði áður en lögreglu tókst að hafa uppi á henni.
Maxwell fór huldu höfði áður en lögreglu tókst að hafa uppi á henni. AP/John Minchillo

Saksóknarar í New York hafa farið fram á að minnsta kosti 30 ára dóm yfir Ghislaine Maxwell, vinkonu Jeffrey Epstein sem var fundin sek um að hafa stundað mansal með því að útvega Epstein stúlkur undir lögaldri til að misnota.

„Ghislaine Maxwell mistnotaði ungar stúlkur kynferðislega árum saman. Það er erfitt að gera of mikið úr glæpum hennar og þeim skaða sem hún olli. Glæpir hennar kalla á réttlæti,“ sögðu saksóknarar í umsögn sinni til dómstólsins í New York í gær.

Verjendur Maxwell hafa kallað eftir því að hún verði dæmd í vel undir 20 ára fangelsi en það er undir dómaranum komið hvað verður. Ákvörðunar hans er að vænta eftir um það bil viku.

Saksóknararnir í málinu segja Maxwell hafa verið skipulagða og útsmogna í glæpum sínum. Hún hafi setið um ungar stúlkur og skapað þær aðstæður sem leiddu til þess að þær voru misnotaðar kynferðislega.

Þeir segja gjörðir Maxwell ekki aðeins hafa endurspeglað lítilsvirðingu fyrir öðrum manneskjum heldur einnig að í hennar augum hafi ungar stúlkur í erfiðum aðstæðum ekki verið annað en hlutir sem máttu síðan missa sín þegar þeir höfðu verið notaðir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×