Erlent

Kólumbíumenn kjósa vinstrimann í forsetaembættið í fyrsta sinn

Hólmfríður Gísladóttir skrifar
Petro hlaut 50,5 % atkvæða og sigraði andstæðing sinn með 720.000 atkvæðum.
Petro hlaut 50,5 % atkvæða og sigraði andstæðing sinn með 720.000 atkvæðum.

Fyrrverandi uppreisnarmaðurinn Gustavo Petro vann sigur í forsetakosningunum í Kólumbíu í gær. Petro verður fyrsti vinstrimaðurinn í sögu landsins til að gegna forsetaembættinu.

Francia Marquez verður varaforseti landsins, fyrst svartra kvenna. Marquez, sem er einstæð móðir og starfaði áður sem þerna, hefur barist ötullega fyrir mannréttindum og umhverfisvernd. „Í dag hafa allar konur sigrað,“ tísti hún eftir að úrslitin lágu ljós fyrir.

Petro tilheyrði M-19 uppreisnarhreyfingunni en varð síðar þingmaður og borgarstjóri Bogota. Andstæðingur hans í kosningunum, athafnamaðurinn Rodolfo Hernandez, játaði sig sigraðan í gær og sagðist vona að niðurstaðan yrði öllum til góðs.

Í sigurræðu sinni kallaði Petro eftir samstöðu og sagði gagnrýnendur sína verða velkomna í forsetahöllinni til að ræða þau vandamál sem steðjuðu að landinu. Þau eru mörg en gríðarleg óánægja ríkir meðal þjóðarinnar vegna vaxandi ójafnréttis og framfærslukostnaðar.

Petro sagðist myndu hlusta á raddir hins þögla meirihluta; bænda, innfæddra, kvenna og ungmenna. Meðal þeirra sem óskuðu honum til hamingju með sigurinn voru Antony Blinken, utanríkisráðherra Bandaríkjanna, og Andres Manuel Lopez Obrador, forseti Mexíkó.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.