Atvinnulíf

Stóra uppsögnin: Fólk þarf að langa að vera í vinnunni

Rakel Sveinsdóttir skrifar
Herdís Pála Pálsdóttir  er sjálfstætt starfandi stjórnunarráðgjafi og stjórnendaþjálfi sem hefur sérhæft sig í mannauðsmálum og rekstri um árabil. Herdís er ein þeirra sem sagði upp starfi sínu til þess að fara að starfa sjálfstætt og telst því til giggara. Áður var hún var áður framkvæmdastjóri mannauðs- og rekstrar hjá Deloitte. 
Herdís Pála Pálsdóttir  er sjálfstætt starfandi stjórnunarráðgjafi og stjórnendaþjálfi sem hefur sérhæft sig í mannauðsmálum og rekstri um árabil. Herdís er ein þeirra sem sagði upp starfi sínu til þess að fara að starfa sjálfstætt og telst því til giggara. Áður var hún var áður framkvæmdastjóri mannauðs- og rekstrar hjá Deloitte.  Vísir/Vilhelm

Á Viðskiptaþinginu 2022 sem haldið er á Alþjóðlega mannauðsdeginum föstudaginn 20.maí næstkomandi, er sjónunum beint að mannauðsmálum. Enda telja ríflega 40% stjórnenda í 400 stærstu fyrirtækjum á Íslandi að skortur verði á vinnuafli á næstunni.

Atvinnulífið hefur fjallað nokkuð um þessi mál en tölur í Bandaríkjunum og Evrópu sýna að fólk er í síauknum mæli að taka ákvörðun um að hætta í vinnunni og gera jafnvel róttækar breytingar.

The Great Resignation er tímabil vinnumarkaðarins núna. Eða Stóra uppsögnin.

Þá sýna tölur einnig að giggurum fjölgar á methraða, en giggarar er sá hópur fólks sem kýs að starfa sjálfstætt en ekki sem fastráðnir launþegar.

Í þessari viku mun Atvinnulífið fjalla sérstaklega um nýjar áherslur í mannauðsmálum og hvað mögulega þarf til, svo ekki stefni í skort á vinnuafli.

Við byrjum vikuna á því að fá nokkur góð ráð hjá Herdísi Pálu Pálsdóttur, stjórnunarráðgjafa og stjórnendaþjálfa en hún gaf út bókina Völundarhús tækifæranna árið 2021, ásamt Árelíu Eydísi Guðmundsdóttur. Sú bók fjallar sérstaklega um þá þróun sem er að sýna sig með fjölgun giggara og fyrirséðum breytingum á vinnumarkaði.

Við báðum Herdísi um góð ráð og dæmi fyrir vinnustaði til að bregðast við þessari þróun.

„Það er nú reyndar ansi margt í þessu samhengi sem hægt er að nefna og ekki endilega það sama fyrir alla vinnustaði en hér koma nokkrir þættir sem ættu að nýtast öllum, við að skapa eftirsóknarverðari vinnustaði, til að laða að og halda í gott fólk. Útfærslan þarf þó að taka mið af aðstæðum á hverjum stað,“ segir Herdís Pála.

Góðu ráð Herdísar: Það sem vinnustaðir geta gert

1. Stjórnun

Fækkið daglegum verkefnum stjórnenda.

Setjið meiri tíma í að sinna mannaforráðum, auka og bæta samskipti, byggja upp og viðhalda trausti. Veita endurgjöf og leiðbeina. Sýna fólki áhuga og umhyggju. Vita hvernig fólki líður og hvort það er sátt í starfi. Mynda sterk tengsl svo fólki finnist það tilheyra og vilji síður fara annað. Til að lesa í aðstæður og framtíðina.

2. Þjálfun

Auka þarf mjög alla þjálfun, ekki síst vegna hraðrar tækniþróunar og breytinga á störfum og starfsumhverfi.

Einnig þarf að auka stjórnendaþjálfun, stjórnendur eru í lykilhlutverki við að laða að og halda í gott fólk

Þjálfun í aðlögunarhæfni nýtist sem dæmi bæði stjórnendum og almennu starfsfólki mjög vel þar sem breytingar eru stöðugar og sífellt hraðari.

3. Innri vinnumarkaður

Gerið vinnustaðinn að vinnumarkaði fyrir fólk sem þegar er í starfi. Finnið leiðir til að auka tækifærin fyrir það til að prófa eitthvað nýtt, læra og þróast á vinnustaðnum.

Brjótið niður múra á milli deilda og starfsheita. Gefið fólki fleiri og fjölbreyttari tækifæri, til að sinna verkefnum utan núverandi deildar eða starfsheitis, svo það þurfi ekki að fara annað til að fá slík tækifæri.

4. Aukinn sveigjanleiki

Horfið á sveigjanleika með gleiðlinsu en ekki með rörsýn. Sveigjanleiki snýst ekki bara um val um að vinna á vinnustaðnum eða heima. Eða klukkan hvað fólk mætir og hættir.

Brjótið störf upp í verkefni. Fjölgið tegundum ráðningarforma. Horfið á frammistöðu umfram unna tíma. Veitið fólki frelsi til að gigga samhliða föstu starfi. Styðjið fólk í að vinna á nýjum stöðum, taka stundum vinnufrí (e. workcation) og svo líka reglulega algjört frí (e. vacation). Styðjið fólk til heilbrigðrar samþættingar vinnu og einkalífs.

5. Vinnustaðarmenning, fjölmenning og velsæld

Skoðið hverju, hvaða hegðun og frammistöðu, þið eruð að veita mesta athygli og hvað þið látið viðgangast.

Aukið fjölbreytileika og fjölmenningu á vinnustaðnum og passið einnig vel upp á góða inngildingu (e. inclusion).

Styðjið vel við starfsfólk sem einstaklinga, þeirra líkamlegu, andlegu, félagslegu og fjárhagslega heilsu, þeirra almennu velsæld.

Hannið vinnuumhverfið þannig að öllum líði vel þar og langi að vera þar.


Tengdar fréttir

„Á heimsvísu fjölgar giggurum stórkostlega“

Árið 2020 var 33% vöxtur á giggstörfum á heimsvísu og samkvæmt rannsókn McKinsey myndi einn af hverjum sex starfsmönnum í hefðbundnu starfi helst vilja starfa sjálfstætt. Spár gera ráð fyrir gífurlega hröðum vexti gigg-hagkerfisins á næstu árum.

Tíu bestu löndin fyrir giggara að búa

Giggarastörf er sú tegund starfa sem fjölgar hvað hraðast í heiminum í dag, nánast á ógnarhraða.  Giggarastörf eru þó misþekkt eftir löndum. Til dæmis er umræðan um giggarastörf á Íslandi frekar ný á nálinni.

CCP um mannauðsmálin: Algjörlega ný hugsun nauðsynleg

Breyttur veruleiki atvinnulífs kallar á að stjórnendur og vinnuveitendur almennt þurfa að nálgast hlutina með algjörlega nýrri hugsun að mati framkvæmdastjóra mannauðssviðs CCP. Sumt sem þessu fylgi verði ekki skemmtilegt og um margt flókið. 

Giggstörfum fjölgar: Hafa frelsið til að velja sér lífstíl

„Nú er svo komið að mestur vöxtur er í slíkum störfum og atvinnurekendur segjast oft ekki fá fólk í ákveðin störf nema tímabundið og þeir sem gigga velja sér lífsstíl út frá verkefnum sínum,“ segir Árelía Eydís Guðmundsdóttir dósent við Viðskiptafræðideild Háskóla Íslands um þá þróun að sífellt fleira fólk kýs að starfa sjálfstætt á verktakasamningum, frekar en að ráða sig sem launþega. Árelía segir helsta gallann við giggið felast í því að fólk upplifir oft, sérstaklega í byrjun, meiri óvissu um tekjur. ,,Hins vegar sagði einn giggari í rannsókninni að „það að vera launþegi er fullkomið óöryggi.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×