Innherji

Jarðboranir fá 155 milljóna króna reikning frá Skattinum

Hörður Ægisson skrifar
Í fyrra námu tekjur Jarðboranna vegna verkefna á Íslandi rúmlega 1.100 milljónum króna, eða um þriðjungur af heildartekjum samstæðunnar á árinu 2021.
Í fyrra námu tekjur Jarðboranna vegna verkefna á Íslandi rúmlega 1.100 milljónum króna, eða um þriðjungur af heildartekjum samstæðunnar á árinu 2021.

Ríkisskattstjóri tilkynnti Jarðborunum í síðasta mánuði um fyrirhugaða endurákvörðun gjalda fyrir árin 2017 til 2020 vegna viðskipta við hollenska dótturfélag sitt Heklu Energy BV. Standi sú ákvörðun Skattsins þá mun tekjuskattur og álag Jarðborana vegna þessa tímabils hækka um 155 milljónir króna.

Greint er frá þessari ákvörðun Skattsins í nýbirtum ársreikningi Jarðborana en tekið er fram að fyrirtækið, sem er að stærstum hluta í eigu Samherja og íslenskra lífeyrissjóða í gegnum félagið SF III, muni taka til varna þar sem það telji að öll viðskipti milli félaganna hafi verið eðlileg.

Tekjur Jarðborana á árinu 2021, sem var þá með starfsemi á Íslandi, Azoreyjum í Portúgal og Djíbútí, námu samtals 3.258 milljónum króna og minnkuðu um liðlega 170 milljónir á milli ára. Rekstarhagnaður fyrir afskriftir (EBITDA) nam hins vegar rúmlega 500 milljónum borið saman við rekstrartap upp á 183 milljónir á árinu 2020. Þá minnkaði einnig heildartap félagsins verulega og var 90 milljónir í fyrra en 621 milljón árið áður.

Meðalfjöldi starfsmanna hjá samstæðu Jarðboranna í fyrra var 79 talsins borið saman við 87 starfsmenn á árinu 2020.

Fram kemur í skýrslu stjórnar að rekstur síðasta árs hafi verið „í járnum eins og áætlanir höfðu gert ráð fyrir.“ Rekstrarhorfur fyrir árið 2022 væru hins vegar betri og áætlað sé að hagnaður verði af starfsemi félagsins að nýju eftir tap síðustu tveggja ára. Umtalsverðar fjárfestingar eru fyrirhugaðar í ár, meðal annars vegna endurvottunar á tveimur stærstu borum fyrirtækisins. Þá er áætlað að lausafjárstaða og eigið fé haldist sterkt.

Í árslok 2021 námu heildareignir Jarðborana rúmlega 5,5 milljörðum króna og var eigið fé félagsins um 3,55 milljarðar króna.

Sigurður Sigurðsson hefur verið forstjóri Jarðborana frá því í ársbyrjun 2016. Þá var Höskuldur Ólafsson, fyrrverandi bankastjóri Arion banka, fenginn inn sem stjórnarformaður félagsins á síðasta ári.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.