Innherji

Innherji verður til

Hörður Ægisson, Ólöf Skaftadóttir og Þorsteinn Friðrik Halldórsson skrifa
Ritstjórn Innherjans frá vinstri Ólöf Skaftadóttir, Hörður Ægisson og Þorsteinn Friðrik Halldórsson
Ritstjórn Innherjans frá vinstri Ólöf Skaftadóttir, Hörður Ægisson og Þorsteinn Friðrik Halldórsson

Fjölmiðlar á Íslandi þurfa að laga sig að breyttum veruleika. Tæknirisar hrifsa til sín sífellt stærri hlut af auglýsingatekjum, Ríksútvarpið heldur uppteknum hætti í samkeppni við einkamiðla og verðhækkanir á pappír grafa undan rekstrargrundvelli prentmiðla sem var veikur fyrir. Afleiðingarnar birtast okkur í atgervisflótta í blaðamennsku og því að rekstur stórra prentmiðla er háður innspýtingu frá eigendum þeirra. Þetta er vonlaus staða.

Á vettvangi stjórnmálanna hefur umræðan um bráðavanda íslenskra fjölmiðla snúist um hvernig skuli deyfa einkennin fremur en að lækna sjúkdóminn. Svo virðist sem ráðamönnum þyki ógerlegt að koma böndum á erlenda tæknirisa og þeir forðast eins og heitan eldinn að styggja Ríkisútvarpið sem leikur lausum hala á auglýsingamarkaði.

Hvernig snúum við vörn í sókn þegar fullreynt er að bíða eftir stjórnvöldum? Rótgrónum fjölmiðlafyrirtækjum úti í heimi hefur tekist að breyta viðskiptalíkani sínu þannig að þau reiða sig í sífellt meiri mæli á stafrænar áskriftartekjur. Stafrænum áskriftum fjölgar gríðarlega í hverjum mánuði hjá The New York Times sem var áður rekið með tapi en er nú orðinn arðbær fjölmiðill. Fjölmörg dæmi um slíkan viðsnúning má finna í nágrannalöndum okkar.

Lærdómurinn er sá að fólk er reiðubúið að greiða fyrir vandaðar umfjallanir og afþreyingu sem hefur upplýsingagildi. Þessi lærdómur er meginástæðan fyrir því að Innherja, nýjum og sjálfstæðum áskriftarmiðli á Vísi, var komið á fót. Við ætlum ekki að eltast við fréttatilkynningar. Á síðum Innherja verður boðið upp á leiðandi umfjöllun um viðskiptalífið, efnahagsmál og innlend stjórnmál með þeim hætti að lesendur sjái hag sinn í að kaupa áskrift.

Fyrst um sinn verður aðgangur að efninu opinn. Innherji verður hins vegar í stöðugri þróun til að laga sig að kröfum lesenda og undirbúa læsingu efnisins á bak við greiðslugátt. Að læsa efni er skref sem margir fjölmiðlar munu þurfa að taka ef ætlunin er að reksturinn þeirra verði sjálfbær og að stöðva atgervisflótta í greininni. Það er meðal annars hugmyndin á bak við Innherja.

Ritstjórn Innherja


Tengdar fréttir

Hörður og Ólöf leiða nýjan viðskiptamiðil á Vísi

Nýr miðill sem sérhæfir sig einkum í fréttum um íslenskt viðskiptalíf og efnahagsmál hefur göngu sína á Vísi á næstunni. Fyrir miðlinum fara þau Hörður Ægisson og Ólöf Skaftadóttir en auk þeirra kemur til starfa viðskiptablaðamaðurinn Þorsteinn Friðrik Halldórsson. Um verður að ræða fréttamiðil í áskrift.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×