Viðskipti innlent

Hrönn nýr fram­kvæmda­stjóri Ný­sköpunar­sjóðs at­vinnu­lífsins

Eiður Þór Árnason skrifar
Hrönn Greipsdóttir hefur víðtæka reynslu af rekstri fyrirtækja og fjárfestingum.
Hrönn Greipsdóttir hefur víðtæka reynslu af rekstri fyrirtækja og fjárfestingum. Aðsend

Hrönn Greipsdóttir hefur verið ráðin framkvæmdastjóri Nýsköpunarsjóðs atvinnulífsins og tekur við af Huld Magnúsdóttur, sem lætur af störfum að eigin ósk um næstu mánaðamót.

Hrönn hefur frá árinu 2015 stýrt fjárfestingafélaginu Eldey, sem fjárfesti í afþreyingartengdri ferðaþjónustu og var í stýringu hjá Íslandssjóðum. Þetta kemur fram í tilkynningu en Hrönn er viðskiptafræðingur að mennt með MBA gráðu í fjármálum auk prófs í verðbréfamiðlun.

Eignasafn Eldeyjar var selt Kynnisferðum í árslok 2020 og var starfsemin sameinuð um mitt síðasta ár. Áður starfaði Hrönn sem forstöðumaður hjá Arion banka og framkvæmdastjóri hjá SPRON. Þá hefur Hrönn einnig verið framkvæmdastjóri Hótels Sögu ehf., sem rak Hótel Sögu og Hótel Ísland.

Að sögn Nýsköpunarsjóðs atvinnulífsins hefur Hrönn setið í fjölmörgum stjórnum sem spanna allt frá litlum frumkvöðlafyrirtækjum til eftirlisskyldra fjármálafyrirtækja. Hrönn er í stjórnum átta fyrirtækja á vettvangi ferðaþjónustu, ýmist sem stjórnarmaður eða formaður. Þeirra á meðal eru Kynnisferðir hf. og Reykjavík Excursion hf., Basecamp Iceland ehf., Íslenskar heilsulindir ehf. og Norðursigling hf.

Full tilhlökkunar

Sigurður Hannesson, formaður stjórnar Nýsköpunarssjóðs, segir að það sé fengur fyrir sjóðinn að fá Hrönn til starfa og hún hafi mikla reynslu og þekkingu af fjárfestingum og rekstri fyrirtækja.

„Sjóðurinn gegnir mikilvægu hlutverki í atvinnulífinu og hefur á síðasta aldarfjórðungi stutt við fjölmörg fyrirtæki, skapað störf og verðmæti. Ég býð Hrönn velkomna til starfa og þakka fráfarandi framkvæmdastjóra, Huld Magnúsdóttur, fyrir góð störf í þágu NSA og nýsköpunar á Íslandi undanfarin ár,“ segir hann í tilkynningu.

„Ég er full tilhlökkunar að takast á við spennandi og krefjandi verkefni í nýsköpunarumhverfinu, þar sem svo mikil gróska ríkir um þessar mundir. Vonandi nýtist reynsla mín og þekking vel til góðra verka á þessum vettvangi hjá Nýsköpunarsjóði atvinnulífsins,“ segir Hrönn.

Huld Magnúsdóttir, fráfarandi framkvæmdastjóri, tók við stöðunni vorið 2017. Hún segir að tíminn hjá sjóðnum hafi verið gefandi og hún sé þakklát fyrir samstarfið við starfsfólk, stjórn, ráðuneyti og þau félög sem tilheyri eignasafni Nýsköpunarsjóðs.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.