Fjáreignir Frumtaks 2, samlagshlutafélag sem var stofnað um fjárfestar sjóðsins árið 2014, nema samtals um 11,4 milljörðum króna og var gangvirði þeirra hækkað um meira en sex milljarða á liðnu ári og byggist það meðal annars á þekktu viðskiptaverði með hlutabréf félaganna. Í nýbirtum ársreikningi félagsins er sú hækkun ekki sundurliðuð milli ólíkra fyrirtækja í eignasafni Frumtaks 2 en ljóst er að hún stafar einkum af eignarhlutnum í Controlant.
Fyrir utan að fara með 8,7 prósenta hlut í Controlant er sjóðurinn til dæmis stór hluthafi í Sidekick Health, Meniga, Kaptio og Tuliopop.
Gengi óskráðra hlutabréfa Controlant, sem hefur meðal annars verið í lykilhlutverki við dreifingu á bóluefni gegn COVID-19 fyrir lyfjarisann Pfizer, fimmfaldast á um einu ári og undir lok ársins 2021 og fram í byrjun þessa árs voru mörg stór viðskipti með bréf í félaginu á genginu 15 þúsund krónur á hlut. Miðað við gengi bréfanna á þeim tíma var markaðsvirði tæknifyrirtæksins um 90 milljarðar króna sem er meira en markaðsvirði meirihluta skráðra félaga í Kauphöllinni.
Frumtak 2 átti í ársbyrjun 2021 tæplega 700 þúsund hluti í Controlant, um 13 prósent af hlutafé, en seldi 175 þúsund hluti í byrjun árs 2021, eins og Innherji hefur sagt frá. Skömmu áður, í nóvember 2020, hafði verið greint frá því að Frumtak 1, sem er undir hatti sama sjóðastýringarfélags og keypti sig fyrst inn í Controlant árið 2011, hefði selt rúmlega 11 prósenta hlut sinn fyrir um 2 milljarða. Gengið í þessum viðskiptum sjóða Frumtaks var rétt rúmlega 3 þúsund krónur á hlut.
Fram kemur í ársreikningi Frumtaks 2 að sjóðurinn hafi selt eignir á árinu 2021 fyrir 544 milljónir og að söluhagnaðurinn hafi verið 31,5 milljónir króna.
Hlutabréfaverð Controlant fór að lækka nokkuð þegar líða fór á þetta ár, samhliða óróa á erlendum mörkuðum og miklum verðlækkunum tæknifyrirtækja, og talsvert var um stór viðskipti með bréf félagsins á genginu 10 þúsund krónur á hlut í febrúar og mars. Sjóvá sá þannig meðal annars ástæðu til að senda frá sér tilkynningu til Kauphallarinnar í byrjun apríl um að tryggingafélagið hefði fært niður virði óskráðra eigna um 300 milljónir og skýrðist niðurfærslan að mestu vegna breytinga á gengi bréfa Controlant. Sjóvá hafði áður bókfært 1,38 prósenta hlut sinn í fyrirtækinu á einn milljarð króna í árslok 2021.
Frumtak 2 hefur sjö ára líftíma en stjórn félagsins er heimilt að framlengja hann þrisvar sinnum, um eitt ár í senn. Í skýrslu stjórnar kemur fram að þegar hafi verið samþykkt að framlengja líftímann fram í nóvember 2022 og að áhersla sjóðsins sé nú lögð á sölu eigna til þess að geta lokið þeim innan þess tímaramma sem hann hefur.
Um mitt árið í fyrra kláraði Frumtaks Ventures fjármögnun og stofnun á þriðja vísissjóðnum – Frumtak 3 – og er hann 7 milljarðar króna að stærð. Frumtak 3 er sérhæfður vísisjóður sem mun fjárfesta í nýsköpunarfyrirtækjum sem eru á fyrstu stigum fjármögnunar og þykja vænleg til vaxtar á alþjóðlegum mörkuðum. Gert er ráð fyrir að sjóðurinn muni fjárfesta í 8 til 10 fyrirtækjum fyrir um 200 til 500 milljónir króna í hverju félagi.
