Lög­brjóturinn Út­lendinga­stofnun

Mál bandarísku konunnar Kyana Sue Powers sýnir á mjög skilvirkan hátt og augljósan hátt hvernig Útlendingastofnun stundar það kerfisbundið að níðast á þeim sem vilja flytja til Íslands og búa á Íslandi.

Ég eins og aðrir hef aðeins lesið um þetta mál í fjölmiðlum en ljóst er að Útlendingastofnun fer að meirihluta á móti lögum um útlendinga (80/2016). Þar sem þar er að finna ýmsar leiðir og heimildir til þess að fresta brottvísun Kyana Sue á meðan mál hennar er í vinnslu. Sú fullyrðing Útlendingastofnunar að þessi kona sé ekki sérfræðingur í samfélagsmiðlum er fáránleg, þar sem í reynd þá eru ekki til neinir sérfræðingar í samfélagsmiðlum, enda hafa samfélagsmiðlar eins og þeir eru í dag aðeins verið til síðan árið 2018, það er ekki nægur tími til þess að fá fram sérfræðinga.

Vinnumálastofnun er einnig lögbrjótur í þessu máli. Þar sem þau virðast gera konunni og lögfræðingi hennar eins erfitt fyrir þeim að sækja um atvinnuleyfi eins mögulegt og hægt er. Svona hegðun opinberrar stofnunar á ekki að líðast og það hreinlega þarf rannsókn óháðs eftirlits til þess að komast að því hvað er í gangi þarna og reka síðan þá með skömm sem bera ábyrgð á þessu.

Málefni útlendinga á Íslandi eru ekki í lagi og ástæðan er sú að fordómar, kynþáttahatur og annar viðbjóður einkennir alla vinnslu íslenska ríksins á þessum málaflokki og þannig hefur það verið í marga áratugi. Nýlegt frumvarp Innanríkisráðherra um útlendinga er nýjasta dæmið í þessari ógeðisherferð rasista á Íslandi gegn útlendingum sem vilja búa á Íslandi. Það er löngu kominn tími til þess að þessu verði breytt og tekið verði á þessum málum með virðingu og með lögmætum hætti. Ríkisstofnun sem brýtur lög viljandi er stjórnlaus ríkisstofnun og þar ber að skipta um yfirmenn og alla stjórn. Það eru fleiri ríkisstofnanir á Íslandi sem brjóta lög stöðugt, eins og nýlegir dómar í hæstarétti sýna. Það er mögulegt að það þurfi að dæma Útlendingastofnun og Vinnumálastofnun fyrir hæstarétti svo að þær láti af þessum lögbrotum sínum.

Það á að leyfa Kyana Sue að búa á Íslandi. Þar sem augljóst er að hún vill búa á Íslandi, í öllum storminum og öðru sem fylgir því að búa á Íslandi. Hvorki Útlendingastofnun eða Vinnumálastofnun ættu að standa í vegi fyrir henni. Það er ljóst að Kyana hefur skapað sér sína eigin vinnu og hefur alveg ágætt úr því starfi. Þessi þvermóðska Útlendingastofnunar og Vinnumálastofnunar er því fáránleg og ekki í samræmi við staðreyndir og rök eins og þetta er sett fram í fjölmiðlum. Rökleysi er oft notað hjá báðum þessum stofnunum til þess að réttlæta ákvarðanir miðað við önnur mál sem hafa komið fram í fjölmiðlum á undanförnum árum.

Síðan er ríkisstofnun eins og Útlendingastofnun eitthvað sem mun á næstu áratugum tilheyra fortíðinni. Heimurinn er að breytast og eitt af því sem mun hverfa eru rasískar ríkisstofnanir sem stjórna og gefa fólki leyfi til þess að flytja á milli landa. Heimurinn breytist því miður of hægt en þetta mun gerast á endanum.

Höfundur er rithöfundur.