Ellefu ár eru liðin frá því átök hófust í Sýrlandi með tilheyrandi mannúðarkreppu. UNICEF segir í frétt að þessum átökum, árásum og fólksflótta, sem skilur börn eftir á vergangi í eigin landi, sé hvergi nærri lokið. Og áhrifanna gætir mest á lífi saklausra barna.
UNICEF segir að 900 börn hafi látist eða særst í átökum í Sýrlandi á síðasta ári. „Til að setja þann fjölda í íslenskt samhengi þá er það aðeins minna en sem nemur öllum börnum, 14. ára og yngri, sem bjuggu á Seltjarnarnesi á síðasta ári (931). Jarðsprengjur, sprengjuleifar og önnur ósprungin hergögn voru helsta ástæða þess að börn létu lífið eða særðust í Sýrlandi í fyrra.“
„Nærri fimm milljónir barna hafa fæðst í Sýrlandi frá árinu 2011 og hafa aldrei þekkt annað en stríð og átök. Í mörgum hlutum Sýrlands lifa börn í sífelldum ótta við hættuna af yfirvofandi árásum, jarðsprengjum og öðrum leifum stríðsins,“ segir Bo Viktor Nylund, fulltrúi UNICEF í Sýrlandi, í tilkynningu vegna þessara sorglegu tímamóta stríðsins þar í landi.
Í Sýrlandi og nærliggjandi ríkjum eru 5,8 milljónir barna sem þarfnast mannúðaraðstoðar. UNICEF og samstarfsaðilar vinna áfram sem endranær þrotlaust að vernd þessara barna, réttindagæslu og velferð. Ekki síst að hjálpa þeim að vinna úr því sálræna áfalli sem fylgir því að alast upp sem barn í stríði og á sífelldum flótta.
UNICEF á Íslandi hefur um árabil staðið fyrir neyðarsöfnun fyrir börn frá Sýrlandi. Hér finnur þú upplýsingar um hvernig þú getur styrkt þá söfnun.
Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.
