Teitur segir af sér vegna Sund­laugar­túns: „Þetta er sví­virði­legt“

Teitur staðfestir í samtali við fréttastofu að hann hyggist segja af sér í fyrramálið. Ákvörðunina hefur hann ekki tilkynnt samflokksmönnum sínum formlega en uppsagnarbréf er í smíðum.

Það hefur verið deilt um lóðir við Vesturbæjarlaugina árum og áratugum saman. Lóðirnar sem um ræðir standa við bakgarð einbýlishúsa við Einimel og svo Vesturbæjarlaugina. Skipulags- og samgönguráð vilja leysa áralanga deilu með því einfaldlega að stækka einkalóðirnar.

Lausn borgarinnar felst í því að lengja lagaleg lóðamörk íbúanna um þrjá metra inn á túnið, en taka af þeim svæðið sem það hefur „haft í fóstri“ undanfarna áratugi. Fyrirhugaðar breytingar voru til umfjöllunar í kvöldfréttum Stöðvar 2 fyrr í kvöld.

Teitur segist ekki geta staðið undir þessum málalyktum og hyggst hann því segja af sér. Frá og með morgundeginum verður hann því ekki varaborgarfulltrúi fyrir Samfylkinguna. 

„Þetta er svo yfirgengilegt og þá get ég alveg eins hugsað: Á ég að sækja um að taka í fóstur hluta úr Laugardalnum? Eða til dæmis úr Hljómskálagarðinum, á ég kannski að taka hundrað fermetra í fóstur þar? Bíða svo í þrjátíu ár og fara síðan að semja við borgina? Og fá þarna fullt af peningum fyrir? Þetta er svívirðilegt,“ segir Teitur.

Hann segir að meirihlutinn stilli málinu upp sem einhverri sátt en því fari fjarri lagi. Samflokksmenn hans séu langt frá því að vera einróma með ráðstöfun borgarinnar. Margir innan Samfylkingarinnar séu bæði sárir og bitrir yfir málalokunum.

„Lóðaverð þarna er sennilega með því hæsta sem gerist á Íslandi. Það er bara þannig. Og þó að þetta sé garður þá er samt alveg rosalegt value í þessu. Bara eftir þetta, þá er eignaverðið á þessum eignum búið að aukast um nokkrar milljónir fyrir ríkasta fólkið í Vesturbænum - á kostnað krakka og hundafólks sem er búið að hittast þarna ár eftir ár. Þetta er skammarlegt,“ segir Teitur.

Tilfinning Teits er sú að borgin hafi ekki þorað að leysa málið með formlegum hætti. Hann hafi hingað til staðið í þeirri trú að borgaryfirvöld hygðust skikka lóðaeigendur til að rífa niður girðingarnar, sem náð hafa inn á borgarlandið, en sú hafi ekki verið raunin.

„Ef það á að leysa þetta mál og ef það stefndi í einhver málaferli, þá eiga þau að fara í málaferli. Við eigum ekki að semja um svona mál. Ég er búinn að vera með augun á þessu mjög lengi, þessum landþjófnaði ríka fólksins, og mér var alltaf tjáð að ég þyrfti ekki að hafa neinar áhyggjur.

Það er ekkert hægt að koma svona fram við fólk og við eigendur þessa almannarýmis. Við erum að fara að gefa ríkasta fólki í borginni þessa lóð. Það er ekki eins og þetta fólk vanti pening. Núna verða þau aðeins ríkari.“

Teitur segist einfaldlega ekki geta staðið með ráðstöfunininni og hættir því sem varaborgarfulltrúi Samfylkingarinnar: „Ég get ekki stutt þetta. Það er bara útilokað.“