Innlent

Erfitt að sjá hverju tak­markanir skila þegar út­breiðslan er svona mikil

Hallgerður Kolbrún E. Jónsdóttir skrifar
Willum Þór Þórsson hyggst tilkynna afléttingar í síðasta lagi á föstudag. 
Willum Þór Þórsson hyggst tilkynna afléttingar í síðasta lagi á föstudag.  Vísir/Vilhelm

Willum Þór Þórsson heilbrigðisráðherra segir erfitt að sjá hverju sóttvarnatakmarkanir skili nú þegar útbreiðsla kórónuveirunnar er jafn mikil og raun ber vitni. Hann stefnir að því að aflétta öllum sóttvarnaaðgerðum innanlands og á landamærum í síðasta lagi á föstudag. 

„Mér ber skylda samkvæmt sóttvarnalögum að horfa til samfélagslegra þátta: Félagslegra og efnahagslegra. Eftir því sem útbreiðslan verður meiri rofnar þetta samhengi milli samkomutakmarkana og þess að hefta útbreiðslu veirunnar,“ sagði Willum í Bítinu á Bylgjunni í morgun. Hann segir að ríkisstjórn muni funda í dag um stöðuna. 

Hann segir að framan af hafi það sýnt sig að rökrétt hafi verið að aflétta í skrefum, sérstaklega þegar horft er til heilbrigðiskerfisins. Erfitt sé þó að sjá nú hverju sóttvarnaaðgerðir skili. 

„Nú erum við búin að létta allverulega og þegar útbreiðslan er orðin þetta mikil þá er mjög erfitt að sjá hvað samkomutakmarkanir, hverju þær skila. Við höfum haldið í grímuskyldu og nándarreglu og við getum auðvitað áfram, og þurfum áfram, að fara varlega í kringum viðkvæmari hópa og heilbrigðisstofnanir og passa upp á okkur,“ segir Willum. 

Hjarðónæmi ekki langt undan

Staðan sé þó líklega orðin þannig að hjarðónæmi sé á næsta leiti. Í dag hafa rúmlega 112 þúsund landsmenn greinst smitaðir af veirunni en ef marka má nýlega mótefnarannsókn Íslenskrar erfðagreiningar hafa tvöfalt fleiri smitast af veirunni, það er minnst 220 þúsund manns. 

„Mér sýnist vera farið að hægja aðeins á þessu aftur samkvæmt greiningunum en það má alveg búast við því að næstu tvær til þrjár vikur verði erfiðar og það verður álag á heilbrigðisstofnunum áfram. Það er búið að vera allan tímann og má segja í gegn um þessi tvö ár,“ segir Willum. 

Hann hafi þó áhyggjur af því hvaða áhrif afléttingar muni hafa á heilbrigðisstofnanir. 

„Vissulega hef ég áhyggjur af því og viðurkenni að þetta birtist fyrst og fremst í því að starfsfólk í heilbrigðiskerfinu, bæði á sjúkrastofnunum, spítalanum og hjúkrunarheimilum, er að veikjast og er frá vegna vinnu og þá eykst álag á þá sem eru að sinna þessu.“

Vonar að ferðaþjónustan taki við sér og krónan styrkist

Hann segir að þegar hann tali um allsherjar afléttingar eigi hann líka við landamærin. Á þessari stundu greinist innan við tíu prósent allra þeirra, sem greinast smitaðir, á landamærunum og samkvæmt tillögum Alþjóðaheilbrigðismálastofnunarinnar sé það ekki ástæða til að hafa takmarkanir á landamærum. 

„Við sjáum til dæmis að Norðmenn hafa aflétt öllum takmörkunum á landamærum. Það dregur úr þessu flækjustigi, sem er alltaf dálítil hindrun, til að mynda þegar ferðamenn eru að ákveða að bóka og ferðast og ég held að það verði líka ánægjuefni fyrir ferðaþjónustuna okkar og efnahaginn,“ segir Willum. 

„Ég tala nú ekki um að það væri nú til þess fallið, ef við fáum svolítið af ferðamönnum hingað í sumar, þá myndi krónan styrkjast aðeins og það myndi vinna gegn þessari innfluttu verðbólgu.“

Hann segir Þórólf Guðnason sóttvarnalækni hafa skilað sér minnisblaði með tillögum um afléttingar. Næst sé að fá stöðumat hjá landlækni um stöðuna á heilbrigðisstofnunum og svo að kalla saman ríkisstjórnina. 

„Nú þurfum við að breyta aðeins nálguninni í þessu, við auðvitað þurfum að halda áfram með Covid-göngudeildina og umönnun þeirra sem á innlögn þurfa að halda og við þurfum að tryggja það að fólk geti prófað sig og skráð þetta allt saman hjá sóttvarnalækni en að öðru leiti léttum við á þessum takmörkunum.“


Tengdar fréttir

Landspítalinn býst ekki við að kalla fólk úr einangrun

Landspítalinn hyggst ekki sækja um undanþágur frá einangrun fyrir starfsfólk sitt nema brýna nauðsyn beri til, að sögn forstjórans. Sóttvarnalæknir segir að forsendur séu fyrir því að veita slíkar undanþágur í ljósi mikillar útbreiðslu kórónuveirusmita og mönnunarvanda á heilbrigðisstofnunum.

Öllu aflétt í síðasta lagi á föstudag

Willum Þór Þórsson heilbrigðisráðherra á von á því að tilkynnt verði um afléttingar innanlands og á landamærum í allra síðasta lagi á föstudaginn. Þetta kom fram í máli hans að loknum ríkisstjórnarfundi í morgun.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.