„Menn eru komnir í harðsvíraðan fjárhættuspilarekstur“

Starfshópurinn telur að hvorki samkeppnissjónarmið né mögulegt tekjutap dugi til að slá því á frest að grípa til aðgerða sem tryggja ábyrga spilun. Happdrætti Háskóla Íslands beri að leggja sérstaka áherslu á skaðaminnkandi aðgerðir.

„Niðurstöður innlendra og erlendra rannsókna sýna einnig fram á skýr tengsl milli spilavanda og notkunar spilakassa.“

Alma Hafsteinsdóttir er formaður samtaka áhugafólks um spilafíkn. Hún furðar sig á því að skýrslan sé fyrst gerð opinber núna. 

„Við gerum alvarlegar athugasemdir við það að rektor Háskóla Íslands hafi verið ljóst í júní að fjármagnið sem er að koma í gegnum þessa spilakassa sé að koma frá spilafíklum. Við höfum vissulega talað um að háskólanum sé ekki stætt á að standa í þessum rekstri en það hefur ekki verið tekið mark á okkur.“

Jón Atli segir að ákvörðun hafi verið tekin um að slá birtingu skýrslunnar á frest vegna alþingiskosninga og ráðherraskipta.

Jóni Atla hafi þótt eðlilegt að Jón Gunnarsson nýr dómsmálaráðherra fengi að mynda sér skoðun á málinu í ljósi þess að þetta sé sá rammi sem Alþingi hafi skapað skólanum. Hann segist taka málið alvarlega og leggja áherslu á skaðaminnkandi aðgerðir.

„Það er nauðsynlegt að horfa á málið heildstætt eins og kemur fram í skýrslunni. Þetta er sú leið sem valin hefur verið til þess að Háskóli Íslands fjármagni sínar byggingar og viðhald; það er í gegnum Happdrættið svo að við þurfum bara að fara yfir þetta með stjórnvöldum. 

Við getum ekki tekið neinar einhliða ákvarðanir um að fara út úr þessu vegna þess að það myndi hafa mjög alvarleg áhrif á okkar stöðu en með því að fara í þessa vinnu með þessari skýrslu og þá vinnu sem Happdrættið hefur farið í erum við að beita okkur fyrir því að það verði meiri ábyrgð sem búi þarna að baki. Þessi starfshópur sem skilaði niðurstöðum þarna, hann var skipaður af mér til þess að fara yfir málið vegna þess að við tökum þetta mjög alvarlega,“ sagði Jón Atli.

Jón Atli og formaður nefndarinnar hittu dómsmálaráðherra í janúar og ræddu um niðurstöður starfshópsins. 

„Stjórnvöld hafa skapað okkur þennan ramma. Þetta er samkvæmt lögum sem við vinnum; lögum um Happdrætti Háskólans og þessa fjármögnun.“

Nú þegar það liggur fyrir að það eru meira og minna spilafíklar sem halda uppi rekstrinum, er ekki óhætt að segja að tíminn sé á þrotum og að hver einasta vika skipti þá máli með núverandi fyrirkomulag?

„Ég get bara ekki tjáð mig um það en við höfum bara nálgast þetta mál þannig að við höfum beitt okkur fyrir skaðaminnkun með Happdrættinu sem hefur verið leiðandi hvað það varðar.“

Dómsmálaráðherra segir í samtali við fréttastofu að hann muni ekki tjá sig um málið fyrr en starfshópur á vegum dómsmálaráðuneytisins muni skila af sér skýrslu um sama málefni. Alma er ein þeirra sem situr í nefndinni. Hún segir að nefndin hafi ekki komið saman síðan á fundi í nóvember og að niðurstöðu sé ekki að vænta í bráð.

Fréttastofa greindi frá því á dögunum að fyrirtækið Háspenna, sem er rekstraraðili spilakassa á vegum HHÍ hafi fengið 17 milljónir í lokunarstyrk árið 2020 vegna faraldursins en greitt eigendum sínum út 12 milljónir í arð það sama ár. Alma segir að menn séu komnir langt út fyrir það sem upphaflega stóð til.

„Við höfum lengi gagnrýnt þetta. Menn eru komnir langt út fyrir það sem upphaflega stóð til. Upphaflega átti þetta að vera fjáröflunarverkefni og einhver fjáröflunarleið fyrir Háskóla Íslands, Rauða Krossinn og Landsbjörg en reyndar var SÁÁ inn í þessu en dró sig úr. Menn eru komnir í harðsvíraðan fjárhættuspilarekstur og það eru einkaaðilar hér í samfélaginu sem hafa verulega hagsmuni af þessum rekstri og það er eitthvað sem stóð aldrei til. Spilafíklar standa undir hagnaði fyrirtækja og þetta er kannski svona það ljótasta sem við höfum séð.“

Hér má nálgast skýrslu starfshópsins. 

Fjallað var um spilafíkn í Kompás fyrir tæpum tveimur árum. Þáttinn má sjá hér að neðan.