Þingvallavegi lokað vegna aðgerða á fimmtudag og föstudag

9. febrúar 2022 18:31

Þingvallavegur verður lokaður frá klukkan átta og fram eftir degi á fimmtudag og föstudag. Vísir/Vilhelm

Þingvallavegur verður lokaður fyrir alla almenna umferð á fimmtudag og föstudag frá klukkan átta á morgnanna og fram eftir degi, á meðan aðgerðir viðbragðsaðila standa þar yfir.

Þetta kemur fram í tilkynningu frá lögreglunni á Suðurlandi. Gert er ráð fyrir að fimmtíu til sextíu manns muni taka þátt í aðgeðrum við Þingvallavatn á morgun. Þar á meðal verða sextán kafarar á vegum Landhelgisgæslunnar, sérsveitar ríkislögrelgustjóra og slökkviliðs höfuðborgarsvæðisins ásamt fólki frá Slysavarnafélaginu Landsbjörgu og lögreglunni á Suðurlandi.

Um er að ræða flókna og umfangsmikla aðgerð en lík farþeganna sem fórust um borð í flugvélinni TF-ABB á fimmtudag eru nú á minnst 35 metra dýpi og flugvélaflakið á tæplega 50 metra dýpi.

Í dag hafa viðbragðsaðilar verið að setja upp vinnubúðir og aðstöðu við vatnið fyrir viðbragðsaðila. Verið er að setja þar upp þrjú tjöld, rafstöðvar, lendingarstað fyrir þyrlu Landhelgisgæslunnar og afþrýstiklefa fyrir kafara.

Fram kemur í tilkynningu lögreglunnar að ytri lokunarpóstar, sem settir verða upp í fyrramálið, verði við afleggjarann að Steingrímsstöð og við Veiðilund, þannig að umferð verði ekki hleypt að Steingrímsstöð. Fyrir utan viðbragðsaðila munu einungis fjölmiðlamenn fá að fara inn fyrir ytri lokun og verða þeir að geta framvísað blaðamannapassa við komuna.

Flugslys við Þingvallavatn Grímsnes- og Grafningshreppur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.