Innlent

Reyna ekki að ná þeim látnu upp fyrr en í fyrsta lagi á fimmtu­dag

Eiður Þór Árnason og Óttar Kolbeinsson Proppé skrifa
Oddur Árnason, yfirlögregluþjónn á Suðurlandi. 
Oddur Árnason, yfirlögregluþjónn á Suðurlandi.  Vísir/Egill

Lík flugmanns og þriggja farþega sem voru um borð í flug­vélinni TF-ABB fundust um það bil 300 metrum frá flugvélaflakinu og á minnst 37 metra dýpi.

Til stóð að reyna að ná einu þeirra upp á yfirborðið í kvöld en horfið var frá því þegar veður versnaði. Útlit er fyrir að aðgerðir muni ekki hefjast á ný fyrr en á fimmtudag.

Þetta segir Oddur Árnason, yfirlögregluþjónn á Suðurlandi. Líkamsleifarnar voru staðsettar með sónarkafbát en stuðst var við gögn úr farsímum og upplýsingar um leið flugvélarinnar til að afmarka leitarsvæðið við Ölfusvatnsvík.

Stefnt er að því að sækja brakið á fimmtudag eða föstudag eftir að veður lægir og er forgangsatriði að ná hinum látnu upp á yfirborðið sem fyrst.

„Ef það er veðurgluggi fyrir því þá verður farið af stað í það en aldrei fyrr en öryggi kafaranna og þeirra sem koma að þessari aðgerð er tryggt,“ segir Oddur í samtali við fréttastofu. Um sé að ræða áhættusama aðgerð og ólíklegt að nokkuð verði hægt að gera á morgun eða þriðjudag vegna veðurs.

Skiptir máli að hafa kyrran bát

„Það er nauðsynlegt að tryggja öryggi kafaranna. Köfun niður á þessu dýpi getur varið í hámark tuttugu mínútur á hvern kafara og þá hefur þú sex mínútur til að vinna á botninum. Það er aðgerð sem þarfnast undirbúnings, þarf að framkvæma við bestu aðstæður og allt að ganga upp.“

Um leið og fyrsta líkið fannst með kafbátnum stóð til að senda kafara niður í vatnið en þegar undirbúningi lauk höfðu aðstæður breyst.

„Það fór að hvessa og það skiptir miklu máli að hafa bát á vatninu sem er hægt að halda kyrrum á þeim punkti þar sem köfnunin fer fram. Það var ekki hægt með tryggum hætti og þar með var snúið frá verkefninu,“ segir Oddur.

Umfangsmikil leit fór fram í og við Þingvallavatn í dag. Vísir/Bjarni

Vilja ekki gefa upp þjóðerni

„Það er ómetanlegt að ná þessum árangri þó þetta sé einungis hálfur sigurinn því það er auðvitað gríðarlega mikilvægt að ná bæði hinum látnu upp og svo vélinni í framhaldi af því,“ segir Oddur.

Talið er að vélin hafi brotlent á vatninu og fólkið komist út að sjálfsdáðum áður en hún sökk til botns.

Aðspurður um það hvort eitthvað liggi fyrir um orsök slyssins segir Oddur að það sé efni yfirstandandi rannsóknar. Engin ástæða sé til að geta sér til um hvað hafi gerst fyrr en allar upplýsingar og gögn liggi fyrir.

Fram hefur komið um er að ræða íslenskan flugmann og þrjá erlenda ferðamenn sem voru í útsýnisflugi. Aðstandendur tveggja farþega eru komnir til landsins og voru sumir þeirra viðstaddir leitina í dag. Von er á fjölskyldu þess þriðja með næstu ferð til Íslands. 

Oddur segir að aðstandendur hinna látnu hafi óskað eftir því að lögregla veiti ekki upplýsingar um þjóðerni þeirra. Greint hefur verið frá því að tveir ferðamannanna sem voru um borð hafi verið áhrifavaldar og sá þriðji starfsmaður belgísks fatafyrirtækis.


Tengdar fréttir

Búið að finna öll fjögur líkin

Búið er að finna lík flugmannsins og farþeganna þriggja sem voru um borð í flug­vélinni TF-ABB. Þetta staðfestir Oddur Árnason, yfirlögregluþjónn hjá lögreglunni á Suðurlandi, í samtali við fréttastofu en umfangsmikil leit hefur farið fram í og við Þingvallavatn í dag.

Flak flug­­vélarinnar mjög heil­­legt á botni vatnsins

Flak flug­vélarinnar TF-ABB, sem fannst á botni Þing­valla­vatns á föstudag, er mjög heil­legt. Allt bendir til að flug­vélin hafi hafnað á Þing­valla­vatni áður en hún sökk og þeir fjórir sem voru um borð í henni hafi komist út úr henni af sjálf­sdáðum eftir að hún endaði á vatninu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.