Sú besta í heimi eins og krúttleg lítil stelpa þegar hún bað Tiger um mynd

Nelly Korda er efst á heimslista kvenna í golfi en hún vann PGA-risamótið í ár og tryggði sér einnig Ólympíugull á leikunum í Tókýó í ágúst. Korda er 23 ára gömul og þykir hafa allt til alls til að verða súperstjarna í íþróttinni á næstu árum.

Hún og Tiger eru bæði mikið í Flórída eins og fjölmargir af bestu kylfingum heims en það kom örugglega mjög mörgum á óvart að þau hefðu aldrei fyrst fyrir PNC Championship góðgerðamótið um helgina.

Á PNC Championship spila kylfingar með foreldrum eða börnum. Tiger Woods var að spila með syni sínum Charlie Axel Woods en Nelly Korda með föður sínum Petr Korda sem vann meðal annars risamót í tennis á sínum ferli.

Nelly Korda fékk loksins tækifærið fyrir aftan átjándu flötina á laugardaginn þegar Woods og Charlie kláruðu fyrri umferðina sína á PNC Championship mótinu í Orlando.

Það besta er að atvikið náðist á mynd eins og sjá má hér fyrir neðan.

„Hæ, Tiger,“ sagði Nelly Korda vandræðalega við Tiger Woods og bað hann síðan um mynd. Hann tók henni vel og var að sjálfsögðu til í mynd.

„Nelly,“ svaraði Tiger eins og hann hafði þekkt hana síðan hún fæddist. „Já, þú færða hana, klárt mál,“ sagði Tiger Woods.

Nelly gekk einu skrefi lengra og spurði hvort bróðir hennar fengi líka að vera með á mynd. Bróðir hennar Sebastian Korda er atvinnumaður í tennis eins og pabbi þeirri. Pabbinn tekur síðan myndina af henni og svo er tekin mynd af Sebastian og Petr með Tiger.

Myndbandið sýnir Nelly þegar hún kemur svífandi úr myndatökunni, brosandi út að eyrum, eins og smástelpa nýbúin að opna draumajólagjöfina sína.

Tiger spyr þau síðan að því á hversu mörgum höggum þau kláruðu hringinn sem var 63 högg eins og Woods feðgarnir.

Petr segir að dóttirin hafi borið þau uppi en hún nefnir fuglinn sem faðir hennar náði á annarri holunni.

Nelly þakkar Tiger nokkrum sinnum fyrir og gengur síðan skælbrosandi í burtu. „Draumur minn var að rætast,“ segir hún að lokum.