Menning

Ásta Kaldals boðin upp

Jakob Bjarnar skrifar
Hin þekkta ljósmynd afa Jóns Kaldals og alnafna er tekin í stúdíói Jóns Kaldals við Laugaveg 11 á árunum 1951 eða 1952.
Hin þekkta ljósmynd afa Jóns Kaldals og alnafna er tekin í stúdíói Jóns Kaldals við Laugaveg 11 á árunum 1951 eða 1952. vísir/vilhelm/kaldal

Afkomendur ljósmyndarans Jón Kaldals hafa ákveðið að bjóða afrit af einhverri frægustu ljósmynd þjóðarinnar upp til styrktar Mæðrastyrksnefnd.

„Fjölskyldunni fannst við hæfi að taka frá eintak númer 1 í upplaginu og bjóða upp og láta verðið sem fæst fyrir myndina renna óskipt til styrktar Menntunarsjóði Mæðrastyrksnefndar Reykjavíkur,“ segir Jón Kaldal, sonarsonur Jóns Kaldals ljósmyndara sem tók fræga mynd af Ástu Sigurðardóttur, en þann 21. desember næstkomandi eru 50 ár liðin frá því hún lést, aðeins 41 árs að aldri.

Mikill áhugi hefur verið á Ástu að undanförnu. Skáldkonan er efniviður nýrrar leiksýningar sem er nú á fjölum Þjóðleikhússins í leikstjórn Ólafs Egilssonar og fyrir réttu ári voru fluttir á Rás 1 tveir útvarpsþættir Veru Sölvadóttur um Ástu, sem vöktu mikla athygli. Þá hefur ævisaga Ástu sem Friðrika Benónýsdóttir öðlast nýtt líf.

Ekki eru til margar frægari ljósmyndir á Íslandi en þessi. Ásta Sigurðardóttir var fædd 1930 og lést 21. desember 1971. Ljósmyndin er tekin í stúdíói Jóns Kaldals við Laugaveg 11 á árunum 1951 eða 1952.jón kaldal

„Við í fjölskyldunni höfum fundið fyrir miklum áhuga marga á því að eignast mynd afa af Ástu. Þessi fókus á dramatíska ævi hennar á örugglega sinn þátt í því og svo er þetta auðvitað frábær ljósmynd af gullfallegri konu sem skín af sjálfstæði og kraftur. Hún býður einhvern veginn heiminum birginn á þessari mynd, en hann átti svo ekki eftir að reynast henni góður,“ segir Jón, en myndin var tekin á árunum 1951 eða 1952 þegar Ásta var 21 eða 22 ára gömul.

Úr varð að fjölskyldan ákvað að gefa út takmarkað upplag, 40 númeruð og stimpluð eintök sem eru unnin eftir upprunalega sýningareintakinu, eins og ljósmyndarinn gekk frá því á sínum tíma. Christopher Lund sá um gerð upplagsins sem er Epson Ultrachrome Pro pigment bleksprautuprent á sýrufrían Hahnemuhle PhotoRag Baryta ljósmyndapappír.

Myndin verður afhent þeim sem á hæsta boðið innrömmuð í svörtum tréramma undir glampafríu sýningargleri. Stærð myndar er 25 x 32 cm. Stærð í ramma 43 x 51 cm.

Uppboðið fram á Facebook síðu Jóns Kaldals ljósmyndara og stendur til og með 21. desember, sem er dánardagur Ástu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.