Play hefur miðasölu vestur um haf

Frá þessu segir í frétt Boston Globe. Þar er rætt við Birgi Jónsson forstjóra þar sem hann segir að félagið muni bæta við fleiri áfangastöðum í Norður-Ameríku þegar fram líður.

Í tilkynningu frá Play, sem send var á fjölmiðla á tólfta tímanum, segir að félagið muni fljúga til Logan-flugvallar í Boston og Baltimore/Washington International flugvallar, milli Baltimore og Washington. Play hafi nú fengið öll tilskilin leyfi til að hefja flug til Bandaríkjanna frá bandarískum flugmálayfirvöldum.

„Þessi áfangi er afar þýðingarmikill fyrir PLAY því nú tekur við næsti kafli í sögu félagsins með því að bæta við tengifarþegum yfir Atlantshafið og stækka markaðssvæði PLAY. Í vor verður hægt að fljúga með tengiflugi á milli áfangastaða í Bandaríkjunum, og Parísar, Berlínar, London, Kaupmannahafnar, Dublin, Brussel, Stafangurs, Þrándheims og Gautaborgar í Evrópu.

Með tilkomu Boston og Washington D.C. mun PLAY fljúga til 24 áfangastaða í Bandaríkjunum og Evrópu á næsta ári en til viðbótar við fyrrgreinda áfangastaði flýgur PLAY til Alicante, Amsterdam, Barcelona, Bologna, Gran Canaria, Lissabon, Madríd, Malaga, Mallorca, Prag, Salsburg, Stuttgart og Tenerife.

PLAY mun notast við sex nýjar Airbus A320neo og A321neo flugvélar næsta sumar. Airbus A320 fjölskyldan hentar rekstri PLAY sérstaklega vel. Stærð og drægni vélanna gera PLAY kleift að þjónusta stærri og minni markaði, nær og fjær, og þá eru þær sparneytnar á eldsneyti,“ segir í tilkynningunni.

Síðustu mánuðir krefjandi

Haft er eftir Birgi Jónssyni, forstjóra Play, að það sé hreint út sagt magnað að horfa upp á árangur félagsins, nú þegar það hafi náð því markmiði sínu að hefja sölu á flugi til Bandaríkjanna.

„Síðustu mánuðir hafa verið virkilega krefjandi á þessum óvissutímum sem stafa af kórónuveirufaraldrinum og við værum aldrei komin á þennan stað nema með ótrúlegu baráttuþreki starfsfólks Play sem hefur aldrei látið deigan síga. Þá er ég afskaplega stoltur af því að áætlanir um stækkun leiðakerfis okkar hafi gengið upp í þessu árferði. Árangurinn er öflugt flugfélag sem mun bjóða Íslendingum ódýrari valkost í flugi til Bandaríkjanna. Við finnum fyrir miklum ferðahug, bæði hér á landi og erlendis, en kannanir sýna að tveir þriðju Bandaríkjamanna eru að skipuleggja næsta frí með erlenda áfangastaði efst í huga. Nú getum við loksins boðið flug til og frá Boston og Washington D.C. þannig að ferðalangar geta komist til Íslands og yfir Atlantshafið á viðráðanlegu verði og notið dvalarinnar á áfangastað án þess að þurfa eyða of miklu til að komast þangað,“ er haft eftir Birgi.

Í samtalinu við Boston Globe er rætt um örlög WOW air sem einnig hafi flogið til Boston og líkindin við Play. Segir Birgir að módel WOW hafi gengið mjög vel þar til að félagið hafi byrjað að fljúga á vesturströnd Bandaríkjanna. Segir hann að WOW hafi byrja að nota stærri vélar, meðal annars byrjað að fljúga meðal til Indlands og Ísraels og í raun eyðilagt viðskiptamódel sem var búið að sanna sig.