Atvinnulíf

Karlarnir kvörtuðu en vilja helst vera með konunum en ekki einir

Rakel Sveinsdóttir skrifar
Ísfirðingar hafa haldið skíðagöngunámskeið í yfir tuttugu ár. Fyrir nokkrum árum síðan slógu í gegn kvennaskíðahelgar, námskeið á vegum Hótels Ísafjarðar. Karlarnir kvörtuðu í kjölfarið yfir því að ekki væru sams konar námskeið í boði fyrir þá og því varð úr að bjóða upp á strákahelgar. Ekki reyndist hljómgrunnur fyrir slíkum helgum en karlarnir komu sterkir inn þegar farið var að bjóða upp á námskeiðshelgar fyrir karla og konur.  Hólmfríður Vala Svavarsdóttir segir svæðin á Ísafirði hreint frábær fyrir alls kyns vetrarsport.
Ísfirðingar hafa haldið skíðagöngunámskeið í yfir tuttugu ár. Fyrir nokkrum árum síðan slógu í gegn kvennaskíðahelgar, námskeið á vegum Hótels Ísafjarðar. Karlarnir kvörtuðu í kjölfarið yfir því að ekki væru sams konar námskeið í boði fyrir þá og því varð úr að bjóða upp á strákahelgar. Ekki reyndist hljómgrunnur fyrir slíkum helgum en karlarnir komu sterkir inn þegar farið var að bjóða upp á námskeiðshelgar fyrir karla og konur.  Hólmfríður Vala Svavarsdóttir segir svæðin á Ísafirði hreint frábær fyrir alls kyns vetrarsport.

„Ísfirðingar hafa haldið skíðagöngunámskeið í yfir tuttugu ár en fyrir tæpum tíu árum fórum við að bjóða upp á kvennahelgar sem slógu svo rækilega í gegn,“ segir Hólmfríður Vala Svavarsdóttir eigandi hótels Ísafjarðar.

 „Við fengum athugasemdir frá strákunum um að það væri ekkert námskeið fyrir þá svo að við buðum upp á strákahelgar. Það var enginn hljómgrunnur fyrir því en þegar við fórum að bjóða upp á blandaðar helgar fyrir nokkrum árum þá fór þetta að ganga hjá okkur og við fengum strákana með.“

Löngum hefur fólk stundað að fara í ferðir erlendis til að skíða á veturnar og gera þá vel við sig í leiðinni: Gista á hóteli og njóta matar og drykkjar í bland við útivist og hreyfingu og skemmtilega samveru með vinum og vandamönnum.

Hólmfríður Vala segir hins vegar að skíðagönguhelgarnar á Ísafirði séu svo sannarlega á pari við ferðir erlendis. Þá segir Hólmfríður Vala Covid ekki hafa breytt miklu fyrir ferðaþjónustuna fyrir vestan, að undanskildu því að fram að Covid voru sumargestirnir nær eingöngu erlendir. 

En Íslendingar hafa líka búið sér til sín eigin tækifæri. Til dæmis með Landvættum.

Landvættir og það varð allt vitlaust….

Hólmfríður Vala er alltaf kölluð Vala. Hún og eiginmaður hennar, Daníel Jakobsson, reka gistingu á fimm stöðum á Ísafirði: Hótel Ísafjörð Torg og Horn, Gamla Gistihúsið sem er á tveimur stöðum og á sumrin Hótel Torfnes, sem áður var Hótel Edda. Þá reka þau veitingastaðinn Pollinn.

Síðustu árin hefur hótelið lagt aukna áherslu á uppbyggingu ferðaþjónustu á Ísafirði fyrir allt árið um kring. Þá sérstaklega með því að bjóða upp á vinsæl gönguskíðanámskeið á Seljalandsdal.

„Vestfirðir eru stór náttúruperla með endalausum möguleikum, jafnt að sumri sem vetri. Íslendingar eru að uppgötva Vestfirðina og það er frábært að taka á móti gestum sem hafa aldrei komið hingað áður og eru að upplifa svæðið í fyrsta sinn,“ segir Vala.

Vala segir að í raun hafi Landvættir haft meiri áhrif en heimsfaraldurinn.

Því í Landvættum þarf að leysa eina þraut í hverjum landsfjórðungi.

Ein af þessum þrautum er skíðaganga og það má segja að það hafi allt orðið vitlaust í sportinu við það. Iðkenda fjöldinn margfaldaðist og þá um leið eftirspurnin eftir leiðsögn.“ 

Þá segir Vala Landvætti hafa opnað tækifæri fyrir almenning að taka þátt í íþróttaviðburðum.

„Það er mikill hreyfi áhugi hjá okkur Íslendingum og okkur finnst gaman að prófa eitthvað nýtt. Þegar Landvættaprógramið var sett á var komið tækifæri fyrir almenning að taka þátt í íþróttaviðburðum. Það var því mikil áskorun fyrir marga að læra á skíðin. Fyrir okkur sem höfum alltaf verið í þessu sporti var mjög gaman að sjá íþróttina stækka og fá fleiri með.“

Það er alls ekki svo að allir sem koma í skíðaferðir á Ísafjörð séu þaulvanir skíðamenn. „Sumir eru vanir á svigskíðum á meðan aðrir hafa aldrei stígið á skíði, hvorki gönguskíði né svigskíði,“ segir Vala. En sú menning er að verða sterkari og sterkari að Íslendingar sækja í að fara í skíðaferðir innanlands, njóta útivistarinnar og gera vel við sig í mat og drykk.

Menning að myndast í kringum skíðaferðir

„Við erum alveg sannfærð um að skíðagönguhelgarnar okkar séu á pari við ferð erlendis og finnum fyrir miklum áhuga hjá vinahópum og fjölskyldum að skella sér vestur. Fólk er að gera vel við sig í mat og drykk og skíðar eins og engin sé morgundagurinn,“ segir Vala og bætir við: 

Það er nauðsynlegt að fá eitthvað gott í kroppinn á góðum skíðadegi fyrir vestan. Vala segir suma mæta til að koma á námskeið, aðra til að skíða sjálfir og eins eru viðburðir að verða stærri og vinsælli. Eins og til dæmis Fossagangan eða Skíðavikan. Þá segir Vala marga vilja leiðsögn á námskeiðum sem lið í því að nýta fjárfestinguna sína betur sem felst í skíðabúnaðinum.

„En svo er það einmitt það að það er að myndast þessi menning að fara í skíðaferðir, ekki endilega að fara á námskeið heldur bara að skíða sjálfur. Nota vetrarfrí barnanna og taka langar helgar.“

Vala segir stöðuna alls ekki þannig að allir sem komi í skíðaferð séu þaulvanir skíðamenn.

„Sumir eru vanir á svigskíðum á meðan aðrir hafa aldrei stígið á skíði, hvorki gönguskíði né svigskíði.“

Þá segir hún námskeið vinsæl, bæði hjá þeim sem vilja læra meira en eins að fólk vilji fá leiðsögn til að nýta betur þá fjárfestingu sem skíðabúnaðurinn er.

Vala segist vilja kalla Ísafjörð Skíðagöngubæinn, fjallaskíðabæinn eða bara Skíðafjörð. Allt um kring eru frábær svæði til að leika sér í snjónum, á gönguskíðum, svigskíðum, fjallasíðum, utanbrautarskíðum, snjósleðum eða bara í leikjum.  Vala segir fólk sem sækir Ísafjörð heim á veturnar sé ævintýrafólk og þótt ekki sé hægt að ábyrgjast veðrið sé alltaf hægt að ábyrgjast að upplifunin er geggjuð.

Vala segir áberandi að nú séu konurnar að draga karlana sína með á námskeið og oft komi vinahópar saman.

Strákarnir voru kannski meira þannig að þeir þurftu ekki leiðsögn. Vildu bara læra þetta sjálfir. En það er allt breytt, nú eru þeir óhræddir við að vera byrjendur, detta fyrir framan alla og fá leiðsögn.“

Sjálf hefur Vala mikla trú á þeim tækifærum sem veturinn getur gefið ferðaþjónustunni, sérstaklega á Ísafirði þar sem hún segir svæðin allt í kring hreinlega frábær.

„Við viljum kalla okkur Skíðagöngubæinn, fjallaskíðabæinn eða bara Skíðafjörð. Hér eru endalaus tækifæri til að leika sér í snjónum,“ segir Vala og bendir á að það séu ekki bara gönguskíðin sem henti vel á svæðinu heldur séu þar góð svæði líka fyrir svigskíði, fjallaskíði, utanbrautarskíði, snjósleða og allt vetrarsport.

Á Ísafirði njóti líka viðburðarhelgar og vikur sífellt meiri vinsælda yfir veturinn. Til dæmis Fossvatnsgangan og Skíðavikan.

Við segjum alltaf að við ábyrgjumst ekki veðrið en upplifunin verður geggjuð. Fólkið sem sækir okkur heim er ævintýrafólk sem elskar óveður jafn mikið og sól og logn.“


Tengdar fréttir

Eyddu síðustu krónunum sínum í jólaseríur

Um land allt standa þúsundir fyrirtækjaeigenda frammi fyrir einni spurningu á hverjum degi: Hvernig náum við að lifa heimsfaraldurinn af? Í dag heyrum við dæmisögu um eitt slíkt fyrirtæki og hvernig þeim hefur gengið að takast á við Covid.

„Átti ekki séns í unga fólkið sem var vinsælla á þessum tíma“

„Ég var að verða 35 ára þegar ég sá loksins tækifæri til að halda áfram í námi, ég skráði mig í frumgreinadeild HR, sem þá var gamli Tækniskólinn uppá höfða. Ég lauk síðan B.Sc. í Viðskiptafræði Vörustjórnunarsviði í Janúar 2004,“ segir Stella Leifsdóttir eigandi verslunarinnar Belladonna.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.