Innlent

Landsbankinn minnkar við sig með flutningi í nýbyggingu

Heimir Már Pétursson skrifar

Landsbankinn mun einungis nýta sextíu prósent af nýbyggingu sinni í miðborginni en selja eða leigja hinn hlutann. Byrjað verður að klæða bygginguna í næstu viku og vonast er til að flutt verði inn fyrir lok næsta árs.

Lilja Björk Einarsdóttir bankastjóri Landsbankans leiðir okkur stolt um nýbyggingu bankans. Við byrjum í efri kjallara hússins þar sem meðal annars verða bílastæði sem tengjast allt frá bílakjallara Hörpu í gegnum bílakjallara undir Hafnartorgi allt að Ingólfstorgi.

Lilja Björk Einarsdóttir segir bankann vera að minnka við sig úr um 20 þúsund fermetrum í tíu þúsund fermetra með flutningi í nýju bygginguna.Stöð 2/Einar

Það sér loks fyrir endan á miklum byggingarframkvæmdum á Hörpu reitnum því nýi Landsbankinn er að verða tilbúinn. Það styttist í að það verði farið að klæða hann allan að utan með blágrýti eða stuðlabergi. Grjótið kemur frá námu í Hrunamannahreppi og töluvert magn þarf til að þekja alla bygginguna.

„Þetta verður mjög fallegt. Tónar við Hörpu og mjög íslenskt og skemmtilegt að horfa á hér á þessum stað við Arnarhólinn,“ segir Lilja Björk þar sem hún sýnir okkur vegg sem búið er að klæða með grjótinu í bílakjallara.

Nú fjórum árum eftir að byrjað var að undirbúa bygginguna vonar Lilja að hægt verði að flytja inn í húsið fyrir lok næsta árs. Bankinn verði með starfsemi í tveimur af fjórum hlutum hússins.

Á þessari mynd sést hvernig nýja Landsbankahúsið skiptist í fjóra hluta og hvernig bankinn sér fyrir sér nýtingu á húsnæðinu. Bankinn ætlar sjálfur að nýta um 60 prósent af byggingunum.Landsbankinn

„Við höfum haldið okkur alveg við upphaflegar forsendur varðandi nýtingu. Þannig að við erum að fara í um sextíu prósent af húsinu. Sem þýðir að við erum þá að fara úr um tuttugu þúsund fermetrum þegar við byrjuðum, erum aðeins búin að vera að minnka við okkur, niður í tíu þúsund fermetra. Húsið allt er sextán þúsund og fimm hundruð fermetrar þannig að hinir sex þúsund og fimm hundruð verða leigðir út eða seldir,“ segir Lilja Björk.

Landsbankabyggingin mun setja sterkan svip á miðborgina. Þegar hún verður tilbúin líkur um 15 ára tímabili bygginga- og gatnagerðarframkvæmda á svæðinu sem staðið hafa frá því byrjað var að byggja Hörpu í byrjun árs 2007.Landsbankinn

Byrjað verði að ræða við mögulega kaupendur eða leigutaka í byrjun næsta árs. Markmiðið sé að starfsemi í húsinu skapi líf á þessum mikilvæga stað í miðborginni.

„Miðbærinn þarf að vera fullur af lífi. Við erum búin að vera að hugsa okkar hluta, skrifstofuhlutann. Þannig að á jarðhæðinni verður líf. Við drögum okkar starfsfólk niður í mötuneytið í hádeginu. Þar verður fundaraðstaða og aðgengi fyrir fólk að koma til að fá sinnt erindum hjá Landsbankanum. Aðgengi að sjálfsafgreiðslu og svo er auðvitað verslunarhúsnæði líka meðfram á fyrstu hæðinni,“ segir bankastjórinn.

Gert er ráð fyrir greiðum aðgangi hjólandi og gangandi um þennan ramp inn í Landsbankabygginguna þar sem verður aðstaða til að geyma mikinn fjölda reiðhjóla.Stöð 2/Einar

Við flutninginn spari Landsbankinn leigu á um ellefu stöðum í miðborginni og selji gömlu aðalbygginguna. Nýja byggingin verði umhverfisvæn varðandi orkunýtingu og fleira.

„Við hvetjum til vistvænna samgangna og sjálfbærni. Þá erum við til dæmis með þennan hjólaramp hér við hliðina. Það er fyrir hjólandi og gangandi umferð inn í bygginguna og góð aðstaða verður fyrir reiðhjól í húsinu. Þetta tengist hjólreiðastígum Reykjavíkurborgar og verður frábært fyrir starfsfólkið okkar,“ segir Lilja Björk Einarsdóttir.


Tengdar fréttir

Lands­bankinn hagnast um 7,5 milljarða

Hagnaður Landsbankans á þriðja ársfjórðungi 2021 var 7,5 milljarðar króna. Afkoma bankans á fyrstu níu mánuðum ársins 2021 var jákvæð um 21,6 milljarða króna samanborið við 699 milljónir á sama tímabili árið 2020.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.