Innlent

Hefur ekki trú á því að lausa­göngu­bannið verði að veru­leika

Tryggvi Páll Tryggvason skrifar
Ef bannið nær endanlega fram að ganga mun þessi kettlingur ekki fá að ferðast frjáls um götur Akureyrarbæjar frá og með 2025.
Ef bannið nær endanlega fram að ganga mun þessi kettlingur ekki fá að ferðast frjáls um götur Akureyrarbæjar frá og með 2025. Vísir

Ragnheiður Gunnarsdóttir, forstöðukona Kisukots á Akureyri, hefur ekki mikla trú á því að fyrirhugað bann við lausagöngukatta innan bæjarfélagsins verði að veruleika.

Meirihluti bæjarstjórnar Akureyrar samþykkti á fundi sínum á dögunum að banna lausagöngu katta í bænum frá 1. janúar 2025. Miklar umræður hafa skapast um málið og eru skiptar skoðanir á því hvort að bannið eigi rétt á sér eða ekki.

Ein af þeim sem telur að bannið sé misráðið er Ragnheiður, sem um árabil hefur séð um Kisukot, athvarf fyrir ketti á Akureyri. Hún telur að nær hefði verið að framfylgja betur þeim reglum sem þegar eru í gildi.

„Ég er allavega ekki sátt við þetta. Það voru eða eru ágætis reglur í bænum um kattahald sem hefur mjög lítið eða eiginlega ekkert verið fylgt eftir, til dæmis að loka ketti inn á varptíma og fleira svona sem hefði verið hægt að fara eftir. Gera það frekar heldur en að herða þetta,“ sagði Ragnheiður í beinni útsendingu í kvöldfréttum Stöðvar 2 í kvöld.

Ragnheiður hélt á nokkra vikna kettlingi í viðtalinu, en bannið mun að öllum líkindum ná til hans eftir rúm þrjú ár.

„Svona eins og staðan er núna er honum örugglega sama, en kannski þegar hann verður eldra þá er spurning hvað honum finnst. Það eru ekkert allar kisur sem verða sáttar við að verða lokaðar inni því miður.“

Hvernig brýst það út?

„Ýmiskonar hegðunarvandamál, þeir geta farið að pissa inni, þetta getur valdið streitu, þvagfærasýkingum. Dýralæknar hafa einmitt nefnt þetta. Þetta kom fram í ályktun frá Dýralæknafélaginu. Það eru alls konar vandamál sem geta komið upp, offita katta líka.“

Segir Ragnheiður að í ljósi þess að lítið hafi verið gert til að framfylgja núgildandi reglum um kattahald í bænum eigi hún erfitt að sjá hvernig bærinn ætli að framfylgja hertum reglum.

„Ég býst við að þeir myndu þurfa að ráða til fólk til þess því að þetta er svolítið mikil vinna. Ég veit ekki hvernig þeir ætla að fara að því, en ég held að það þurfi nokkrar manneskjur til þess að sjá um að veita þá ketti sem verða lausir í bænum,“ segir Ragnheiður.

Aðspurð um hvort að hún hefði trú á því að bannið muni í raun og veru taka gildi var svarið einfalt.

„Nei.“


Tengdar fréttir

„Frelsi katta skiptir meira máli en frelsis­svipting barns“

„Hvers vegna þegir samfélagið yfir ofbeldi gegn barni en brjálast yfir kynferðisofbeldi? Ekki misskilja mig - ég vil að samfélagið brjálist yfir kynferðisofbeldi. En ég vil líka að það brjálist yfir ofbeldi gegn barni af hálfu kennara!!!“

Dýra­læknar harma lausa­göngu­bann á ketti nyrðra

Dýralæknafélag Íslands segist harma ákvörðun Akureyrarbæjar um að banna lausagöngu katta innan bæjarfélagsins en þetta kemur fram í ályktun sem var send á bæjarstjórn Akureyrarbæjar. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.