Loka skólum og stofnunum í Suðurnesjabæ vegna Covid-smita

Kjartan Kjartansson skrifar 4. nóvember 2021 22:21

Aðgerðastjórn Suðurnesjabæjar hefur ákveðið að loka skólum og stofnunum vegna Covid-19-smita sem hafa greinst á meðal starfsfólks á leikskóla og nemenda í grunnskólanum. Lokanirnar eiga að koma í veg fyrir frekari dreifingu veirunnar.

Starfsfólk á leikskólanum Sólborg í Sandgerði og nemendur í Sandgerðisskóla hafa greinst smitaðir af Covid-19.

Því ákvað aðgerðastjórnin að loka Sólborg um óákveðinn tíma á meðan smitrakning stendur yfir og þar til tekist hefur að ná utan um ástandið. Þá fellur skólahald í Sandgerðisskóla niður á morgun, föstudaginn 5. nóvember.

Auk þess verður Íþróttamiðstöðin í Sandgerði lokuð frá og með morgundeginum og yfir helgina. Félagsmiðstöðin Skýjaborg verður lokuð þar til annað verður ákveðið og kennsla í Tónlistarskólanum í Sandgerði fellur niður á morgun. Bókasafn Suðurnesjabæjar í sandgerði verður einnig lokað fram yfir helgi.

Til stendur að endurmeta aðgerðirnar í byrjun næstu viku, að því er segir í tilkynningu á vef Suðurnesjabæjar.

Bæjaryfirvöld á Akranesi hafa einnig gripið til umfangsmikilla aðgerða og lokana á skólum og stofnunum til að komast fyrir hópsýkingu þar.

Fjöldi smitaðra í gær var sá þriðji hæsti á einum degi frá upphafi faraldursins og aldrei hafa fleiri greinst smitaðir utan sóttkvíar á einum degi.

Faraldur kórónuveiru (COVID-19) Suðurnesjabær Grunnskólar Leikskólar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.