Handbolti

„Hef reynt að kenna honum að orðum fylgir ábyrgð“

Ingvi Þór Sæmundsson skrifar
Arnar Daði Arnarsson er á sínu þriðja tímabili sem þjálfari Gróttu.
Arnar Daði Arnarsson er á sínu þriðja tímabili sem þjálfari Gróttu. vísir/vilhelm

Í viðtali við Vísi eftir eins marks tap Gróttu fyrir Íslandsmeisturum Vals, 21-22, í 1. umferð Olís-deildar karla óskaði Arnar Daði Arnarsson, þjálfari Seltirninga, eftir að dómarar myndu sýna honum meiri virðingu.

„Ég hef látið miður skemmtileg orð falla í garð dómara hingað til á samfélagsmiðlum og ætli ég sé ekki að fá það aðeins í bakið núna. Mikki refur er að dæma þennan leik, ég má ekki segja orð við hann þá fæ ég gult spjald og ég ætla að vona að það verði ekki þannig í allan vetur,“ sagði Arnar Daði. 

„Ég sem þjálfari í handboltaleik hérna, er ekki það sama og ég á samfélagsmiðlum eða á þjóðhátíð eða að skemmta mér niðrí bæ. Ég vil að fyrir mér sé borin sú virðing að ég sé að gera mitt besta hérna og ég sé ekki dæmdur af gjörðum mínum annars staðar.“

Ummæli Arnars Daða voru rædd í Seinni bylgjunni á föstudaginn. Annar sérfræðinganna, Theodór Ingi Pálmason, þekkir kauða ágætlega.

„Eins og þjóð veit var ég með hlaðvarp með Arnari Daða. Þar lét hann oft gamminn geysa um menn og málefni og hefur líka notað samfélagsmiðlana óspart í það. En hann stendur sig mjög vel í þjálfun núna og er að gera góða hluti með þetta Gróttulið. En ég er búinn að reyna að kenna honum það í gegnum tíðina að orðum fylgir ábyrgð. Ég þarf greinilega að fara aðeins betur yfir það með honum eftir þennan þátt,“ sagði Theodór.

Jóhanni Gunnari Einarssyni fannst það skjóta skökku við að Arnar Daði óskaði eftir aukinni virðingu í sama viðtali og hann kallaði annan dómarann [Ramunas Mikalonis] Mikka ref.

„Svo kallar hann hann Mikka ref í viðtalinu. Það er væntanlega eitthvað sem hann bjó til. Hann heitir Mikalonis, kallaður Mikki,“ sagði Jóhann Gunnar.

Klippa: Seinni bylgjan - Ummæli Arnars Daða

„Dómgæslan í leiknum var fín. Hann var að vitna til þess að honum finnst ekki nógu mikil virðing borin fyrir sér út af því að hann fór frjálst með tjáningarfrelsið í hlaðvarpinu. Teddi stjórnaði honum og hafði enga stjórn á honum,“ bætti Jóhann Gunnar við.

„Ég þurfti stundum að klippa eitthvað út,“ sagði Theodór áður en Jóhann Gunnar tók orðið aftur.

„Núna er hann bara kominn í annað hlutverk og auðvitað á enginn dæma hann út frá því sem hann var að gera þá.“ 

Næsti leikur Gróttu er gegn FH í Kaplakrika á fimmtudaginn. Grótta endaði í 10. sæti deildarinnar á síðasta tímabili.


Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.


Tengdar fréttir

Seinni bylgjan fór yfir frábæra frammistöðu Sigurjóns Guðmundssonar

Sigurjón Guðmundsson stóð vaktina í marki HK þegar að liðið tók á móti KA í fyrstu umferð Olís-deildar karla síðasta fimmtudag. Sigurjón varði 18 bolta og sérfræðingar Seinni bylgjunnar veittu honum verðskuldaða athygli. Sigurjón er sonur Guðmundar Hrafnkelssonar, fyrrum landsliðsmarkmanns Íslands.

Seinni bylgjan kynnir nýjan dagskrárlið þar sem Gaupi fer á stúfana

Í gærkvöldi var Guðjón Guðmundsson, betur þekktur sem Gaupi, kynntur sem nýr liðsmaður Seinni bylgjunnar. Gaupi verður með fastan lið sem ber heitið „.Eina“ þar sem að hann fer á stúfana og hittir merkilegt fólk í tengslum við handboltann. Gaupi hitti fyrir Sigurð Örn Þorleifsson, bakarameistara og liðsstjóra handboltaliðs FH.

„Ég vil að það sé borin virðing fyrir mér á vellinum“

„Mér líður nákvæmlega eins og mér leið alltof oft í fyrra. Ég sagði við strákana að ef frammistaðan yrði góð, þá yrði ég sáttur. Við þurfum að fara breyta þeirri hugsun miðað við spilamennsku okkar og hvernig við spiluðum í dag,“ sagði Arnar Daði Arnarsson, þjálfari Gróttu, eftir eins marks tap á móti Val í dag. Lokatölur 22-21. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.