Norður-Kórea kynnti færanlegan lestarskotpall

Tryggvi Páll Tryggvason skrifar 16. september 2021 23:30

Eldflauginni er skotið af lestarvagni. Skjáskot

Spenna fer vaxandi á Kóreu-skaga eftir að bæði Suður- og Norður-Kórea hafa sýnt mátt sinn með því að skjóta eldflaugum á loft. Myndband sýnir að Norður-Kórea hefur nú þróað færanlegan eldflaugaskotpall. Elflaugunum er skotið af lestarvagni.

Um helgina skutu Norður Kóreumenn tveimur langdrægum eldflaugum sem geta borið kjarnorkuvopn á loft á sunnudag. Skömmu síðar skutu Suður Kóreumenn í fyrsta skipti nýrri tegund eldflaugar frá kafbáti og urðu þar með sjöunda þjóðin í heiminum til að búa yfir slíkri tækni.

Þá greinir CNN frá því að gervihnattamyndir sýni að Norður-Kórea vinni nú að því að stækka lykilverksmiðju sem framleiðir auðgað úran, lykilhráefni í gerð kjarnorkusprengja.

Talið er að viðbyggingin við verksmiðjuna geti aukið framleiðslugetu Norður-Kóreu á auðguðu úrani um 25 prósent. Í frétt CNN segir að Bandaríkjastjórn fylgist grannt með gangi mála í Norður-Kóreu.

Vopnaþróun þar virðist vera í fullum gangi en á vef BBC má sjá myndband sem yfirvöld í Norður-Kóreu hafa birt. Þar má sjá eldflaugum skotið á loft af lestarvagni. Segja yfirvöld í Norður-Kóreu að hægt sé að skjóta eldflaugum á skotmark í allt að 800 kílómetra fjarlægð af þessum færanlegu skotpöllum.

Norður-Kórea Suður-Kórea

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.