Innlent

Taka við allt að 120 flótta­mönnum frá Afgan­istan

Eiður Þór Árnason og Kolbeinn Tumi Daðason skrifa
Flóttamannanefnd var kölluð saman að beiðni Ásmundar Einars Daðasonar, félags- og barnamálaráðherra, til þess að útfæra tillögur um hvernig bregðast mætti við neyðarástandinu í Afganistan.
Flóttamannanefnd var kölluð saman að beiðni Ásmundar Einars Daðasonar, félags- og barnamálaráðherra, til þess að útfæra tillögur um hvernig bregðast mætti við neyðarástandinu í Afganistan. Vísir/Vilhelm

Íslensk stjórnvöld áætla að taka á móti allt að 120 flóttamönnum frá Afganistan en heildarfjöldi liggur ekki endanlega fyrir. Ríkisstjórnin samþykkti í morgun tillögur flóttamannanefndar vegna þess ástands sem skapast hefur í Afganistan í kjölfar valdatöku Talibana.

Katrín Jakobsdóttir forsætisráðherra tjáði fréttastofu að loknum ríkisstjórnarfundi að meðal annars væri horft til starfsfólks sem unnið hefði fyrir Atlantshafsbandalagið og fjölskyldna þeirra, einkum þeirra sem störfuðu með íslensku friðargæslunni. 

Þá verði hugað að móttöku einstaklinga sem hafi sótt jafnréttisskóla Sameinuðu þjóðanna og sameiningu kjarnafjölskyldna sem eru búsettar hér á landi. 

Klippa: Stór áskorun að koma fólkinu til Íslands

Skipa sérstakan aðgerðarhóp

Ásmundur Einar Daðason, félags- og barnamálaráðherra, segir að það verði áskorun út af fyrir sig að ná í þetta fólk. Utanríkisráðuneytið þurfi að vera í samstarfi við önnur utanríkisráðuneyti og heri annarra landa. Skipuleggja þurfi næstu skref og flóttamannanefnd muni funda áfram. Þetta sé ekkert lokaskref en þó mikilvægt skref.

Skipaður verður sérstakur aðgerðarhópur til að ná tengslum við fjölskyldur, skipuleggja flutning til landsins og sömuleiðis móttöku. Það verður verkefni næstu sólarhringa og daga, að sögn Ásmundar.

Klippa: Katrín um móttöku 120 flóttamanna frá Afganistan

Ríkisstjórnin samþykkti á fundi sínum í morgun tillögu forsætisráðherra, félags- og barnamálaráðherra, dómsmálaráðherra og utanríkisráðherra um að fallast á tillögur flóttamannanefndar. Fram kemur í tilkynningu frá ríkisstjórninni að erfitt sé meta nákvæman fjölda á þessu stigi þar sem hann fari eftir fjölskyldusamsetningu. 

„Ísland hefur hingað til tekið á móti afgönsku kvótaflóttafólki í samstarfi við Flóttamannastofnun Sameinuðu þjóðanna og mun halda því áfram en í ljósi þess neyðarástands sem nú hefur skapast í Afganistan er hins vegar mikilvægt að íslensk stjórnvöld leggi sitt af mörkum nú þegar,“ segir í tilkynningunni.

Fyrstu viðbrögð og aðgerðir stjórnvalda samkvæmt tillögum flóttamannanefndar:

  • Tekið verður á móti starfsfólki sem vann með og fyrir Atlantshafsbandalagið, ásamt mökum þeirra og börnum. Horft verður sérstaklega til þeirra sem störfuðu með íslensku friðargæslunni.
  • Fyrrverandi nemendum frá Afganistan við jafnréttisskóla Sameinuðu þjóðanna á Íslandi, ásamt mökum og börnum, verður boðið til landsins.
  • Íslensk stjórnvöld munu aðstoða þá Afgana sem eiga rétt á fjölskyldusameiningu eða eru komnir nú þegar með dvalarleyfi hér á landi en geta ekki ferðast á eigin vegum að komast til landsins. Um er bæði að ræða einstaklinga sem hafa fjölskyldutengsl hér sem og einstaklingar sem hyggjast hefja hér nám.
  • Umsóknir um fjölskyldusameiningu, samkvæmt lögum um útlendinga, við Afgana búsetta hér landi verða settar í forgang og aukið við fjárveitingar til þess að hraða umsóknunum.

Flóttamannanefnd leggur sömuleiðis til að stofnaður verði aðgerðahópur sem hefur það hlutverk að útfæra framkvæmd tillagnanna. Hún sé flókin þar sem huga þurfi að flutningi fólksins til landsins, tryggja öryggi þess og nauðsynlega aðstoð við komu til landsins.

Íslensk fjölskylda fór frá Afganistan á sunnudag 

Mikil ringulreið hefur ríkt í Afganistan eftir að hersveitir Talibana náðu þar yfirráðum. Búist er við miklum fólksflutningum frá landinu á næstu misserum vegna þessa en mikil örvænting hefur gripið um sig við alþjóðaflugvöllinn í höfuðborginni Kabúl þar sem gríðarlegur fjöldi hefur reynt að komast úr landi.

Bretland tilkynnti nýverið að þar yrði tekið við tuttugu þúsund afgönskum flóttamönnum og hyggst Kanada gera slíkt hið sama. Á sunnudag var greint frá því embættismenn og 90 flóttamenn frá Afganistan hafi verið fluttir til Danmerkur. Á meðal farþega var íslensk fjölskylda sem var föst í Afganistan. 

Fréttin hefur verið uppfærð.


Tengdar fréttir

Bregðast þurfi við í samstarfi við nágrannaþjóðir

Félagsmálaráðherra segir að íslensk stjórnvöld geti ekki brugðist við stöðunni í Afganistan öðruvísi en í samstarfi við aðrar nágrannaþjóðir. Staðan sé afar flókin enda engin hefðbundin flóttamannamóttaka þar ytra lengur og ekkert hefðbundið flug.

Ringul­reið við flug­völlinn í Kabúl þar sem minnst tuttugu hafa látist

Sjö afganskir borgarar létust nýverið í troðningi við alþjóðaflugvöllinn í höfuðborginni Kabúl, að sögn breska hersins. Mikið öngþveiti og örvænting hefur ríkt þar síðustu daga eftir að Talibanar náðu völdum í landinu. Þúsundir keppast við að komast inn á flugvallarsvæðið og yfirgefa landið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×