Handleggsbrotinn eftir að hafa verið laminn með kylfum

Eiður Þór Árnason skrifar 22. ágúst 2021 07:29

Mikið var um hávaðakvartanir víðsvegar um borgina í gærkvöldi og nótt. Vísir/Vilhelm

Ráðist var á einstakling í miðborg Reykjavíkur og hann laminn með kylfum. Að sögn lögreglu er árásarþoli handleggsbrotinn og var hann fluttur á slysadeild til aðhlynningar. Árásarmennirnir voru farnir af vettvangi þegar lögregla kom á staðinn og er þeirra leitað.

Þetta kemur fram í dagbók lögreglunnar á höfuðborgarsvæðinu en ekki er gefið upp hvenær atvikið átti sér stað.

Tveir voru handteknir og vistaðir í fangaklefa vegna líkamsárásar í Garðabæ. Þar var einnig tilkynnt um slagsmál og eignaspjöll en ró var komin á mannskapinn þegar laganna verðir mættu á staðinn. Að sögn lögreglu voru upplýsingar teknar niður og gengu allir sína leið að því loknu.

Sviptur ökuréttindum

Sautján ára ökumaður var stöðvaður í Ártúnsbrekku eftir að hafa verið mældur á 158 kílómetra hraða og hann sviptur ökuréttindum til bráðabirgða.

Þá var tilkynnt um bílveltu í Kópavogi. Er ökumaður sagður eitthvað lemstraður eftir veltuna og var hann fluttur á slysadeild til aðhlynningar. Að sögn lögreglu var hann án ökuréttinda og undir áhrifum fíkniefna.

Ekið var á ljósastaur í Háaleitis- og bústaðahverfi. Minniháttar meiðsli á ökumanni en bifreiðin var óökufær eftir óhappið og hún flutt á brott með kranabifreið.

Í dagbók lögreglu er greint frá tveimur atvikum þar sem einstaklingur féll á hlaupahjóli og fékk áverka á höfði. Báðir aðilar voru fluttir á slysadeild með sjúkrabifreið.

Þá hafði lögregla afskipti af minnst þremur ökumönnum sem eru grunaðir um akstur undir áhrifum.

Lögreglumál Reykjavík Garðabær Kópavogur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.