Innlent

Nýtt minnis­blað: Svona sér Þór­ólfur fyrir sér fram­tíðina

Eiður Þór Árnason skrifar
Þórólfur Guðnason sóttvarnalæknir segir að huga þurfi að framtíðarfyrirkomulagi sóttvarnaaðgerða vegna Covid-19.
Þórólfur Guðnason sóttvarnalæknir segir að huga þurfi að framtíðarfyrirkomulagi sóttvarnaaðgerða vegna Covid-19. Vísir/Vilhelm

Þór­ólfur Guðna­son sótt­varna­læknir telur ó­lík­legt að hægt verði að af­létta tak­mörkunum innan­lands á meðan far­aldurinn geisar í heiminum. Þetta segir hann í minnis­blaði sínu til Svan­dísar Svavars­dóttur heil­brigðis­ráð­herra um fram­tíðar­fyrir­komu­lag sótt­varna á Ís­landi vegna Co­vid-19.

„Sjúkdómurinn er hvergi á undanhaldi í heiminum og þó að tök náist á faraldrinum á Íslandi þá munum við búa við stöðuga ógn um að veiran berist hingað til lands og valdi hér útbreiddri sýkingu,“ segir Þórólfur í minnisblaðinu sem er dagsett 11. ágúst en var loks afhent fréttastofu í dag. 

Í því nefnir sóttvarnalæknir fjölda aðgerða sem hann leggur til að gildi næstu mánuði hið minnsta. Kallar hann meðal annars eftir því að almenn fjöldatakmörk, sem gætu miðast við 200 manns, og eins metra nándarregla verði áfram í gildi. Grímuskylda verði áfram þar sem ekki er hægt að tryggja nándarmörk.

Vill að stjórnvöld efli getu heilbrigðiskerfisins

Þetta er hluti af þeim aðgerðum Þórólfur kallar á að verði við lýði þar til faraldurinn verður um garð genginn. Þó verði að gera ráð fyrir að tímabundið þurfi að grípa til hertra aðgerða í stuttan tíma ef upp koma óvænt atvik. 

Minnisblaðið var rætt á fundi ríkisstjórnarinnar í morgun. Heilbrigðisráðherra leggur áherslu á að tillögurnar séu innlegg í víðara samtal um takmarkanir en ekki hefðbundið minnisblað sem beri að samþykkja eða hafna. 

Í minnisblaði sínu leggur Þórólfur áherslu á að smitrakning, einangrun smitaðra og sóttkví útsettra verði beitt áfram og að stjórnvöld efli áfallaþol og getu heilbrigðiskerfisins til að annast Covid-sjúklinga án þess að það komi niður á annarri þjónustu.

Stjórnvöld takmarki fjölda ferðamanna ef ekki er hægt að anna skimun

Sóttvarnalæknir segir takmarkanir á landamærum sem fyrr vera mikilvægasta liðinn í sóttvörnum þjóðarinnar. 

Leggur hann meðal annars til í minnisblaði sínu að allir farþegar verði áfram krafðir um neikvætt Covid-próf bæði áður en þeir fara um borð og við komuna til landsins. Sömuleiðis verði allir farþegar, og þar á meðal börn, skimaðir við komuna til landsins. Tvöföld skimun og sóttkví gildi áfram fyrir þá sem geti ekki framvísað gildum vottorðum.

„Ef ekki verður hægt að anna ofangreindum skimunum vegna fjölda ferðamanna þá legg ég til að leitað verði leiða til takmarka fjölda ferðamanna við þann fjölda sem okkar sóttvarnaráðstafanir ráða við,“ bætir Þórólfur við. 

Hann segir koma til greina að taka í notkun antigen hraðgreiningarpróf við landamæraskimun ef núverandi greiningageta við PCR-próf muni ekki duga. 

Vill leyfa stærri viðburði en að staðir loki klukkan 23

Sóttvarnalæknir segir að til greina komi að leyfa stærri viðburði gegn því að gestir framvísi nýlegu neikvæðu Covid-prófi.

Í minnisblaði sínu til heilbrigðisráðherra leggur hann jafnframt til að sund og líkamsræktarstöðvar verði opnar og íþróttastarfsemi leyfð með fjöldatakmörkunum. Þá verði veitingastaðir, skemmtistaðir og barir opnir til klukkan 23.

Sóttvarnalæknir sér ekki fyrir sér að það verði neinar takmarkanir á skólastarfi næstu mánuði en vill að sérstaklega verði hugað að loftræstingu í skólum og á hjúkrunarheimilum.

Heilbrigðisráðherra segir minnisblaðið framtíðarmúsík

Svandís sat fyrir svörum um framtíð sóttvarnaaðgerða í Pallborðinu á Vísi í dag. Aðspurð um hvort 200 manna samkomubann verði raunin næstu misseri sagði hún að umrætt minnisblað væri bara eitt af þeim gögnum sem ríkisstjórnin horfi til.

„Við erum ekki að taka til afstöðu til þess á þessum tímapunkti. Núna erum við með 200 manna samkomubann og næsta skref er að spyrja okkur hvernig við ætlum að ljúka þessari bylgju. Þessar tillögur Þórólfs snúast um það hvernig við ætlum að fara inn í lengri framtíð en ekki hvernig við ætlum að stemma stigu við akkúrat þessari bylgju sem við erum að glíma við í dag,“ sagði Svandís.

„Þessar tillögur eru ekki til þess að afgreiða þær með samþykkt eða synjun akkúrat á þessum tímapunkti heldur miklu frekar til þess að þær séu partur af samtalinu.“

Svandís Svavarsdóttir heilbrigðisráðherra ræddi minnisblaðið í þættinum Pallborðið á Vísi í dag.  Þáttinn má sjá að neðan.


Tengd skjöl


Tengdar fréttir

Fjöldi spítala­inn­lagna aðal­á­hyggju­efnið

„Það sem er leiðinlegt við þetta er hvað útbreiðslan hefur verið mikil þrátt fyrir allt. Þess vegna erum við að fá svona marga inn á spítalann. Það er aðaláhyggjuefnið núna, það er fjöldinn inni á spítala og sérstaklega fjöldinn sem þarf að leggjast inn á gjörgæslu. Það er stóra málið.“ Þetta sagði Þórólfur Guðnason sóttvarnalæknir í samtali við umsjónarmenn Bítisins á Bylgjunni í morgun.

200 manna samkomubann framlengt um tvær vikur

Heilbrigðisráðherra hyggst framlengja gildandi sóttvarnatakmarkanir innanlands um tvær vikur í samræmi við tillögu sóttvarnalæknis. Verður því 200 manna samkomumann og eins metra regla í gildi til og með 27. ágúst. Núgildandi reglugerð átti að gilda til og með næsta föstudegi.

„Ég yrði mjög fljótur að henda inn tillögum“

Fari svo að Landspítalinn lýsi yfir neyðarástandi vegna álags, yrði sóttvarnalæknir fljótur að skila inn tillögum að hertum sóttvarnaráðstöfunum innanlands og minnir á að fækkun smitaðra í samfélaginu taki minnst tvær vikur að skila sér með tilliti til álags á spítalann.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.