„Ég hefði getað farið í ofur­lið og orðið meistari en ég vildi gera það hér“

Milwaukee Bucks varð í nótt NBA-meistari í annað skipti í sögu félagsins. Liðið vann 105-98 sigur á Phoenix Suns og vann þar með einvígi liðanna 4-2 eftir að lenda 0-2 undir. Gríska undrið, Giannis Antetokounmpo, átti stórkostlegan leik í nótt. Hann skoraði 50 stig, tók 14 fráköst og hindraði fimm skot.

Hann var á endanum valinn verðmætasti leikmaður úrslitaeinvígisins svo eðlilega var hann mjög hátt uppi er hann ræddi við blaðamenn að leik loknum.

„Ég vil þakka Milwaukee fyrir að trúa á mig. Ég vil þakka liðsfélögunum, þeir spiluðu hart í hverjum einasta leik. Ég treysti þessu liði. Ég vildi ná þessu hér, í Milwaukee. Ég vildi gera það með þessum gaurum, ég er svo ánægður. Ég er ánægður með að við náðum að vinna.“

Khris Middleton og Giannis hafa verið samherjar hjá Bucks undanfarin átta ár. Þeir komu þangað sem óharðnaðir ungir menn en eru í dag NBA-meistarar.

„Khris, við gerðum það maður. Ég er glaður glaður maður. Þessi gaur veit ekki hversu mikið hann ýtti mér áfram. Hann ýtti mér hvern dag áfram. Ég er glaður að geta stigið út á völl og spilað hverja einustu mínútu með þessum gaur og liðinu sjálfu en sérstaklega Khris.“

Vonbrigði síðasta tímabils hvöttu liðið áfram

Milwaukee steinlá gegn Miami Heat í undanúrslitum Austurdeildarinnar á síðustu leiktíð er keppt var í hinni frægu „sóttvarnarbúbblu“ í Disney World. Þau vonbrigði kveiktu neista hjá Giannis sem rak hann áfram á þessari leiktíð.

„Þegar við komum til baka hugsaði ég með mér að þetta væri mín borg. Þau treysta á mig, þau hafa trú á mér og okkur. Meira að segja þegar við töpuðum í fyrra. Ég vildi klára verkefnið hér og vinna meistaratitil. Það er þrjóska hliðin á mér, það er auðvelt að fara annað og vinna titil með einhverjum öðrum. Ég hefði getað farið í ofurlið, gert það sem ég geri og unnið titil en þetta er erfiða leiðin og leiðin sem ég ákvað að fara,“ sagði Giannis um ákvörðun sína að vera áfram í Milwaukee og að vinna loks titil með liðinu.

„Trúðu bara á það sem þú ert að gera. Haltu áfram að vinna að markmiðum þínum. Ekki láta neinn segja þér hvað þú getur og getur ekki. Fólk sagði að ég gæti ekki hitt úr vítaskotum, ég hitti úr vítaskotunum í kvöld og er meistari,“ sagði Giannis við mikla gleði viðstaddra en hann hefur verið gagnrýndur fyrir lélega nýtingu á vítalínunni.

„Ég hitti úr þeim þegar ég átti að hitta úr þeim. Ég er að djóka, en samt ekki. Bara almenn trú og von. Ég vona að ég gefi fólki frá Afríku og Evrópu von, von um að það sé hægt.“

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.