Bíó og sjónvarp

Sagði sig frá Witcher vegna Ver­búðarinnar

Hallgerður Kolbrún E. Jónsdóttir skrifar
Björn Hlynur sagði sig frá Witcher-þáttunum en hann er núna staddur á kvikmyndahátíðinni í Cannes í Frakklandi.
Björn Hlynur sagði sig frá Witcher-þáttunum en hann er núna staddur á kvikmyndahátíðinni í Cannes í Frakklandi. Getty/Daniele Venturelli

Leikarinn Björn Hlynur Haraldsson sagði sig frá Netflix-þáttunum The Witcher vegna framleiðslu á nýjum íslenskum þáttum, Verbúðinni. Björn Hlynur sló í gegn í hlutverki Eist í fyrstu seríu þáttanna en til stóð að hann léti sjá sig í annarri seríunni en ekkert verður úr því.

„Ég þurfti að segja mig úr því. Ég átti að vera í [annarri seríunni] en af því að ég náði ekki að tengja það saman í skipulaginu við tökurnar á Verbúðinni þurfti ég að segja mig frá því,“ segir Björn Hlynur í samtali við Vísi.

Fyrsta sería Witcher-þáttanna sló sannarlega í gegn þegar hún kom út á Netflix í desember 2019 en leikarinn Henry Cavill fer með aðalhlutverkið í þáttunum. Hann er einna þekktastur fyrir að hafa leikið Superman undanfarin ár.

Tökum fyrir aðra seríu lauk í mars síðastliðnum og mun önnur serían koma á Netflix í desember næstkomandi. Björn Hlynur segir kórónuveirufaraldurinn hafa gert sér erfitt fyrir.

„Út af covid hefði ég þurft að vera svo lengi í sóttkví og þetta tók svo langan tíma frá Verbúðinni að ég bara sagði mig frá því. En ég einmitt sá að það sé verið að fara að sýna aðra seríu og ég hlakka til að sjá það,“ segir Björn Hlynur.

Tvær kvikmyndir á leið í frumsýningu og nóg að gera

Hann segir það hafa opnað margar dyr fyrir sig að hafa tekið þátt í svo stóru verkefni.

„Ég get ekki neitað því að það er gott að vera í svona stórri seríu en þegar maður er kominn á kaf í eigið verkefni eins og Verbúðina, við Vesturportararnir, þá er þetta alltaf spurning um tíma. Hvort hægt sé að sinna þessu svona mikið,“ segir Björn Hlynur.

„En jújú, það er alltaf gott að vera í stórri seríu á Netflix, það eru margir sem sjá það. Það segir sig bara sjálft að það hefur áhrif.“

Eins og fyrr segir er Björn Hlynur á kafi í framleiðslu þáttanna Verbúðin, sem hann og Gísli Örn Garðarsson framleiða ásamt Guðrúnu Láru Alfreðsdóttur. Nú er verið að klippa þættina en þeir verða frumsýndir í lok þessa árs. Það er nóg að gera hjá honum, verið er að fara að frumsýna aðra mynd sem hann lék í og svo var hann að klára tökur fyrir franska mynd sem tekin var upp á Íslandi.

„Við erum að klippa Verbúðina og svo var ég í Dýrinu í allt sumar. Við ætlum að sýna Verbúðina um jólin og svo var ég í Leynilöggunni með Hannesi Halldórs og það er verið að fara að frumsýna hana og hún verður líka sýnd á kvikmyndahátíð úti í Sviss,“ segir Björn Hlynur.

„Það er verið að fara að frumsýna bæði Leynilögguna og Dýrið heima í næsta mánuði. Svo ætla ég að klára Verbúðina það sem eftir er af ári og setja svolítinn tíma í það. Ég er að leika líka í mynd heima, sem er frönsk mynd, og var í tökum í júní. Þannig að það er búið að vera alls konar bíóstand.“


Tengdar fréttir

Kvikmyndin Leynilögga keppir um Gyllta hlébarðann

Á blaðamannafundi í morgun tilkynnti listrænn stjórnandi Locarno að kvikmyndin Leynilögga hafi verið valin á hátíðina. Kvikmyndin keppir þar í aðalkeppni hátíðarinnar sem nefnist Concorso internacionale þar sem keppt er um Gyllta hlébarðann eða Pardo d‘Oro, ein virtustu kvikmyndaverðlaun sem veitt eru ár hvert.

Kann betur við Cannes í Co­vid

Leikarinn Björn Hlynur Haraldsson er staddur á kvikmyndahátíðinni í Cannes í Frakklandi þessa dagana en kvikmyndin Lamb, eða Dýrið, sem Björn Hlynur fer með hlutverk í var frumsýnd á hátíðinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.