Lífið

Segir fólk leggjast í meiri rann­sóknar­vinnu þegar það velur sér hund heldur en maka

Elma Rut Valtýsdóttir skrifar
Kristín Tómasdóttir, para- og fjölskyldumeðferðarfræðingur, býður upp á fyrirbyggjandi hjónabandsráðgjöf í formi uppistands. Uppistandið hefur verið vinsælt í gæsunum, en hún segir það ekki hafa orðið til þess að neinni brúði hafi snúist hugur.
Kristín Tómasdóttir, para- og fjölskyldumeðferðarfræðingur, býður upp á fyrirbyggjandi hjónabandsráðgjöf í formi uppistands. Uppistandið hefur verið vinsælt í gæsunum, en hún segir það ekki hafa orðið til þess að neinni brúði hafi snúist hugur.

Kristín Tómasdóttir, para- og fjölskyldumeðferðarfræðingur og rithöfundur, býður upp á fyrirbyggjandi hjónabandsráðgjöf í formi uppistands. Hún segir tilviljanir ráða of miklu þegar fólk parar sig saman og að fólk leggist í meiri rannsóknarvinnu þegar það velur sér hund heldur en maka.

Fyrirbyggjandi hjónabandsráðgjöfin sem Kristín býður upp á hefur slegið í gegn í gæsunum og saumaklúbbum landsins. Um er að ræða uppistand sem hún byggir á raunverulegum staðreyndum og heimildum um parasambönd. Hún segir það hafa orðið til fyrir algjöra tilviljun þegar hún var að gera lokaverkefni í námi sínu í fjölskyldumeðferð.

„Ég hugsaði með mér að ég gæti skrifað rosalega leiðinlega ritgerð eða ég get gert uppistand sem er skemmtilegt. Það er rosalega gaman að skrifa það en alveg rosalega vont í framkvæmd, að standa fyrir framan fólk sem býður bara eftir því að þú segir eitthvað fyndið,“ segir Kristín um upphafið.

Einstæðingar ættu líka að fara til hjónabandsráðgjafa

Að hennar mati eru allt of fá pör sem leita í fyrirbyggjandi ráðgjöf en hún mælir einnig með hjónabandsráðgjöf fyrir einstæðinga . „Við getum gert miklu meira með því að fyrirbyggja vandann í staðinn fyrir að reyna að setja einhverja plástra. Í rauninni finnst mér að fólk ætti bara að leita til hjónabandsráðgjafa þegar það er einsætt og er í makaleit.“

„Eitt stærsta vandamál sem fylgir hjónaböndum er að þú hefur valið þér vitlausan maka, þannig að hjónabandsráðgjafar ættu að koma miklu fyrr að borðunum þar,“ segir Kristín.

Hún segir þó að engri verðandi brúði hafi snúist hugur eftir að hafa hlýtt á uppistandið hennar, ekki ennþá. „En margir verða mjög hugsi yfir því sem ég er að nefna þarna og byrja að pæla í sínum samböndum.“

Að mati Kristínar ætti að vera hjónabandsráðgjafi inni á öllum stærstu vinnustöðum landsins. „Vegna þess að ef það gengur illa í hjónabandinu okkar, þá erum við ekki að skila jafn miklum afköstum í vinnunni okkar.“

Segir tilviljanir stjórna of miklu í pörun

Skuldbinding er mikilvægasti þátturinn í parasamböndum að mati Kristínar, en hún vill meina að skuldbundið fólk skilji síður. Með skuldbindingu á hún til dæmis við gift pör, pör með börn eða pör með sameiginlegan fjárhag. „En það er ekki út af þessum hlutum, heldur er það vegna þess að þú varst tilbúinn til þess að skuldbinda þig.“

Þá grínast Kristín með það að ráðleggja pörum sem eru að hætta saman að gifta sig frekar. „Það er skemmtilegra að gifta sig heldur en að skilja og ef þú giftir þig, þá skilurðu síður sem er náttúrlega svolítið þversagnakennt,“ segir Kristín og hlær.

Hún telur parasamband vera þá breytu sem hefur hvað mest áhrif á hamingju okkar. „En við erum óttalegir klaufar í þessu. Það er engin sem er búin að kenna okkur þetta og við leggjum alltof litla áherslu á þetta.“

Hún segir alltof algengt að tilviljanir stjórni því hverjir parist saman og hverjir ekki og að fólk leggist í meiri rannsóknarvinnu þegar það velji sér hund heldur en maka. „Þegar þú velur þér hund þá lestu allt um þá hundategund og þú velur hundategund sem hentar vel miðað við þína fjölskyldugerð. Þú lest ættbækur og þú ferð á hvolpanámskeið og ert bara algjör sérfræðingur í þessum hundi.“

„En þegar fólk velur sér maka, þá fer það bara í sleik við hjólið á English og lætur bara þar við sitja.“

Kristín var gestur í Reykjavík síðdegis. Hér að neðan má hlusta á viðtalið í heild sinni.

Hér fyrir neðan er einnig hægt að lesa viðtal Makamála við Kristínu um skilnaði, sambönd og framhjáhald. 


Tengdar fréttir

„Engin skömm í því að vilja vinna úr framhjáhaldi“

„Að mínu mati eru ekki til neinar dæmigerðar framhjáhalds týpur, það er í raun og veru mýta. Ég sé það í meðferðarvinnu að sá sem heldur framhjá gerir það ekkert endilega aftur,“ segir Björg Vigfúsdóttir fjölskyldumeðferðarfræðingur í viðtali við Makamál.






Fleiri fréttir

Sjá meira


×