Körfubolti

Dagur Kár áfram með Grindvíkingum: „Eigum bara eftir að verða betri“

Óskar Ófeigur Jónsson skrifar
Dagur Kár Jónsson er búinn að vera lykilmaður hjá Grindavík undanfarin ár.
Dagur Kár Jónsson er búinn að vera lykilmaður hjá Grindavík undanfarin ár. Vísir/Bára

Dagur Kár Jónsson hefur framlengt samning sinn við Grindavík og mun því spila áfram með liðinu í Domino's deild karla í körfubolta næsta vetur.

Dagur Kár hefur verið með Grindavík frá árinu 2016 fyrir utan tímabilið 2018-19 þegar hann spilaði í Austurríki.

Dagur Kár er enn af bestu leikstjórnendum deildarinnar en í vetur var hann með 16,9 stig og 6,6 stoðsendingar að meðaltali í Domino´s deildinni.

„Ég er virkilega ánægður að hafa gert nýjan samning og líður ótrúlega vel í Grindavík. Við erum að halda í sama kjarna fyrir næsta tímabil sem er mjög mikilvægt og eigum bara eftir að verða betri,“ sagði Dagur Kár í samtali við fésbókarsíðu Grindvíkinga.

Grindvíkingar hafa verið að semja við sína lykilmenn að undanförnu en áður höfðu þeir Kristinn Pálsson og Björgvin Hafþór Ríkharðsson framlengt sína samninga.

Grindavíkurliðið endaði í sjötta sæti í deildinni í vetur og datt út í oddaleik á móti Stjörnunni í átta liða úrslitum í úrslitakeppninni.

Í fréttinni á fésbókarsíðu Grindavíkur kemur fram að frekari frétta sé að vænta af leikmannahópum beggja liða Grindavíkur á næstu dögum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.