Bíó og sjónvarp

Jón Viðar hraunar yfir Kötlu: Ein og hálf stjarna

Snorri Másson skrifar
Jón Viðar fer ófögrum orðum um Kötlu: „Nú virðist Balti telja sig vera orðinn sálfræðileikstjóri, svona eins og Ingmar Bergman (kannski Bergman afturgenginn úr jökulsprungu?! - þetta síðasta á að vera djók en það skilst ekki nema þið hafið haft ykkur í gegnum þessa steypu) því að steypa er það.“
Jón Viðar fer ófögrum orðum um Kötlu: „Nú virðist Balti telja sig vera orðinn sálfræðileikstjóri, svona eins og Ingmar Bergman (kannski Bergman afturgenginn úr jökulsprungu?! - þetta síðasta á að vera djók en það skilst ekki nema þið hafið haft ykkur í gegnum þessa steypu) því að steypa er það.“ Vísir/RÚV

Jón Viðar Jónsson leiklistargagnrýnandi heldur hvergi aftur af sér frekar en fyrri daginn í dómi sínum um Kötlu, nýja Netflix-seríu Baltasars Kormáks Samper.

Jón Viðar segir þáttinn „mesta fyrirgang sem sést hafi í íslensku sjónvarpi“ - Katla fær einkunnina 2 á skalanum 1 til 10 hjá gagnrýnandum þrautreynda. Af fimm stjörnum fengi hún eina og hálfa, skrifar hann á Facebook.

Allir átta þættir fyrstu seríunnar birtust á Netflix á þjóðhátíðardaginn og hafa almennt vakið jákvæð viðbrögð áhorfenda. Á IMDB eru stjörnurnar 7,7 af 10.

Jón Viðar tekur síst undir þann dóm almennings, og gengur svo langt að segjast sjá á eftir þjóðhátíðarkvöldinu sem fór í að horfa á þáttinn. Hann talar um ærandi hávaða, yfirþyrmandi tónlist og læti.

„Leikmynd og myndataka auðvitað smart eins og við er að búast - en til hvers er að vera smart ef hið mannlega drama nær ekki máli - og því fer víðs fjarri að það geri það hér.“

Sagan er að sögn Jóns Viðars þunglamaleg og dugar ekki í sjónvarpsseríu.

„Síðasti þátturinn, þegar höfundurinn hnýtir loks saman þræðina sem hafa verið að þvælast hver um annan í fyrri þáttum, er svo stórkostlegt melódrama að leitun er á öðru eins, jafnvel í hinni fábrotnu og á margan hátt ófrumlegu kvikmyndamenningu okkar Íslendinga.“

Þótt hinn leikræni þáttur sé góður að mati Jóns Viðars er lokaeinkunn sú sem að ofan er getið. Framleiðslan er eins og gefur að skilja í Netflix-verkefni á nokkuð háu plani en Jón Viðar telur að farið hafi fé betra.

„Það er sorglegt að sjá svona mikilli fagkunnáttu og svona miklum fjármunum sóað í svo lítilfjörlegt efni.“

Í grein á Vísi í dag var tekin saman gagnrýni úr ýmsum áttum. Þar lofuðu margir umhverfið, jökulinn og drungann, en að sama skapi var algengt að rætt væri um að efnið væri helst til seigfljótandi og krefðist nokkurrar þolinmæði af áhorfandanum.

Katla er sálfræðilegur vísindaskáldskapur úr smiðju Baltasar Kormáks og Sigurjóns Kjartanssonar og eru allir þættirnir á íslensku. Það eru Baltasar Kormákur, Börkur Sigthorsson og Thora Hilmarsdóttir sem leikstýra þáttunum.


Tengdar fréttir

„Ég myndi alltaf taka þetta í hámhorfi“

„Hún er yfirþyrmandi,“ segir Guðrún Ýr Eyfjörð, spurð hvernig tilfinningin sé að sjá endanlega útgáfu af tæplega tveggja ára vinnu nú þegar íslenska þáttaröðin Katla hefur verið frumsýnd á Netflix.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.