Kawhi-laust Clippers komið í for­ystu sem og At­lanta þökk sé ó­trú­legum síðari hálf­leik

Vinna þarf fjóra leiki til að komast í úrslitaleik Vesturdeildarinnar en sigurvegarinn þar mætir svo sigurvegaranum úr Austurdeildinni í baráttunni um NBA-meistaratitilinn.

Los Angeles Clippers gat vart fengið verri fréttir fyrir leik þegar í ljós kom að Kawhi Leonard, stórstjarna liðsins, væri meiddur á hné og yrði ekki með. 

Paul George, hin stórstjarna liðsins, hefur löngum verið talinn einn betri leikmanna deildarinnar þegar deildarkeppnin er í gangi en hann ku eiga það til að fara í feluleik í úrslitakeppninni.

Sú var ekki raunin í nótt er Clippers vann átta stiga sigur í Utah, 119-111.

Leikurinn var stál í stál í fyrsta leikhluta þangað til Utah náði smá andrými þökk sé ótrúlegri frammistöðu Bogdan Bogdanovic. Hann skoraði úr sex þriggja stiga körfum í fyrsta leikhluta. 

Leikurinn þó áfram í jafnvægi eftir því sem leið á fyrri hálfleikinn en ef ekki hefði verið fyrir sýningu heimamanna fyrir utan þriggja stiga línuna hefði Clippers mögulega stungið af.

Utah Jazz setti niður 17 þrista í fyrri hálfleik, aðeins einu sinni hefur liði í úrslitakeppni NBA tekist að skora úr fleiri þriggja stiga skotum í einum og sama hálfleiknum. Jazz leiddu með fimm stigum í hálfleik, 65-60.

Í þriðja leikhluta steig George upp og Clippers náðu átta stiga forystu. Létu þeir þá forystu aldrei af hendi og unnu á endanum leikinn með átta stiga mun, 119-111.

Paul George var stigahæstur í liði Clippers með 37 stig ásamt því að taka 16 fráköst. Marcus Morris skoraði 25 stig og Reggie Jackson setti 22 stig. Hjá Jazz var Bogdanovic stigahæstur með 32 stig á meðan Donovan Mitchell setti 21 stig.

Í hinum leik næturinnar var mikil dramatík. Atlanta Hawks tókst á einhvern ótrúlegan hátt að grafa sig upp úr djúpri holu sem liðið bjó til í fyrri hálfleik. Philadelphia var með öll völd framan af leik og leiddi með 22 stigum í hálfleik, staðan þá 62-40.

Heimamenn í 76ers byrjuðu leikinn af miklum krafti og virtust nánast vera búnir að klára leikinn þar sem það gekk ekkert upp hjá Atlanta. Þegar 3.50 mínútur voru til leiksloka var munurinn 25 stig og ekkert sem benti til þess að Atlanta væri að fara koma til baka. 

Gestunum tókst að minnka muninn niður í 20 stig áður en leikhlutanum lauk og frábær byrjun í síðasta fjórðung þýddi að allt í einu var munurinn orðinn 14 stig.

Hægt og rólega tókst Atlanta að minnka muninn og eftir nokkrar körfur frá Trae Young var munurinn allt í einu kominn niður í tvö stig og enn rúmlega tvær mínútur eftir. Mínútu síðtar voru Hawks komnir yfir.

Í stöðunni 107-104 fyrir Atlanta var brotið á Joel Embiid en hann klikkaði á báðum vítaskotunum og Atlanta sigldi sigrinum í hús. Ótrúlegur síðasti fjórðungur sá til þess að Atlanta vann þriggja stiga sigur, 109-106, og er nú aðeins einum sigri frá því að komast í úrslit Vesturdeildarinnar.

Trae Young var stigahæstur hjá Hawks með 39 stig en hann hefur aldrei skorað fleiri stig í einum og sama leiknum í úrslitakeppninni. Þar á eftir kom John Collins með 19 og Danilo Gallinari með 16. Hjá Philadelphia var Embiid með 37 stig ásamt því að taka 13 fráköst. Seth Curry kom þar á eftir með 36 stig.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.