Erlent

Handtekni blaðamaðurinn birtist opinberlega

Kjartan Kjartansson skrifar
Roman Prótasevits á fundinum í dag.
Roman Prótasevits á fundinum í dag. Vísir/EPA

Hvítrússneski blaðamaðurinn Roman Prótasevits sem var handtekinn um borð í flugvél Ryanair kom fram á blaðamannafundi í fylgd með embættismönnum í dag. Þar neitaði Prótasevits að hafa verið beittur ofbeldi í haldi yfirvalda og lýsti iðrun vegna meintra glæpa sinna. Stjórnarandstaðan telur að hann hafi verið þvingaður til að koma fram opinberlega.

Stjórnvöld í Minsk þvinguðu flugvél Ryanair til lendingar þegar hún flaug í gegnum lofthelgi landsins á leið frá Grikklandi til Litháen í síðasta mánuði. Prótasevits, sem er sjálfstæður blaðamaður og andófsmaður sem hefur verið í sjálfskipaðri útlegð, var leiddur út úr vélinni áfram Sofiu Sapega, kærustu sinni.

Síðan þá hafa hvítrússnesk yfirvöld birt myndbönd af parinu þar sem þau játa á sig meinta glæpi og virðast þau hafa verið neydd til þess að lesa upp yfirlýsingarnar. Stjórnarandstaðan telur að Prótasevits hafi sætt barsmíðum í varðhaldi.

Prótasevits hefur meðal annars játað sig sekan um að hafa lagt á ráðin um að steypa Alexander Lúkasjenka, forseta, af stóli með því að skipuleggja „óeirðir“ í kjölfar umdeildra kosninga í ágúst. Þá hefur hann dregið til baka gagnrýni sína á Lúkasjenka.

Þegar Prótasevits var leiddur fyrir blaðamenn í dag var hann í fylgd fjögurra embættismanna, þar af tveggja í einkennisbúningi, að sögn Reuters-fréttastofunnar. Þar sagðist hann við góða heilsu og að hann hefði ekki verið þvingaður til samstarfs við yfirvöld.

„Það er allt í lagi með mig. Enginn barði mig, enginn snerti mig. Ég geri mér grein fyrir þeim skaða sem ég olli, ekki aðeins ríkinu, heldur landinu. Nú vil ég gera allt sem í mínu valdi stendur til þess að bæta úr ástandinu,“ sagði Prótasevits.

Umkringdur embættismönnum sagðist Prótasevits alls ekki hafa verið beittur ofbeldi í haldi yfirvalda og að hann væri miður sín vegna þeirra glæpa sem hann hafi framið.Vísir/EPA

„Sena úr Kafka eða Orwell“

Fáir trúa því þó að Prótasevits hafi komið fram ótilneyddur í dag. Franak Viacorka, ráðgjafi Svetlönu Tsikhanouskaju, eins leiðtoga stjórnarandstöðunnar í Hvíta-Rússlandi, tísti að ekki mætti gleyma að Prótasevits væri fangi og að stjórnvöld notuðu hann nú eins og verðlaunagrip.

„Þetta er ekki blaðamannafundur heldur sena úr annað hvort Kafka eða Orwell,“ tísti Viacorka.

Jonah Fisher, fréttaritari breska ríkisútvarpsins BBC, segir að hann og fleiri blaðamenn hafi gengið út af fundinum í dag.

„Tökum ekki þátt þegar hann er greinilega þarna tilneyddur,“ tísti Fisher.

Lúkasjenka hefur setið óslitið á forsetastóli frá 1994 og er hann gjarnan nefndur síðasti einræðisherra Evrópu. Eftir forsetakosningarnar í fyrra, sem stjórnarandstaðan fullyrðir að hafi verið sviksamlegar, lét hann berja niður mótmæli af mikilli hörku.

Evrópskir ráðamenn sökuðu hvítrússnesk stjórnvöld um flugrán þegar þau neyddu vélina sem Prótasevits var farþegi í til þess að lenda. Síðan þá hefur Evrópusambandið samþykkt refsiaðgerðir gegn hvítrússneskum embættismönnum, hvatt evrópsk flugfélög til þess að taka krók fram hjá lofthelgi landsins og bannað hvítrússneskum flugfélögum að fara um evrópska flughelgi.


Tengdar fréttir

Banna hvítrússneskar þotur í Evrópu

Evrópusambandið hefur ákveðið að banna hvítrússneskum flugvélum að fljúga í lofthelgi aðildarríkja sinna og að lenda á evrópskum flugvöllum. Evrópsk flugfélög eru áfram hvött til þess að forðast í lengstu lög að fljúga í gegnum lofthelgi Hvíta-Rússlands.

Hrósaði Lúkasjenka fyrir „stálhreðjar“ hans

Ríkissjónvarp Hvíta-Rússlands birti í dag viðtal við blaðamanninn og aðgerðasinnann Roman Protasevíts, sem var handtekinn þegar áhöfn farþegaþotu RyanAir var þvinguð til að lenda flugvélinni í Minsk í síðasta mánuði.

Andófsmaður reyndi að stinga sig á háls í dómsal

Karlmaður sem var handtekinn á mótmælum gegn stjórn Alexanders Lúkasjenka í Hvíta-Rússlandi í fyrra reyndi að stinga sig á háls í dómsal í Minsk þegar honum var sagt að fjölskylda hans og nágrannar gætu verið sóttir til sakar ef hann játaði sig ekki sekan.

Sögðu áhöfninni að lenda áður en hótunin barst

Flugumferðarstjórar í Minsk sögðu áhöfn flugvélar RyanAir að snúa flugvélinni við og lenda í borginni vegna meintrar sprengjuhótunar, áður en hótunin sjálf barst. Um hálftíma eftir að flugstjóranum var sagt að snúa flugvélinni barst tölvupóstur til nokkurra flugvalla þar sem hótað var að sprengja flugvélina í loft upp yfir Vilníus.

„Ég veit að dauðadómur bíður mín í Hvíta-Rússlandi“

Farþegar í flugvél RyanAir sem snúið var af leið og lent í Minsk í Hvíta-Rússlandi um helgina segja blaðamanninn og aðgerðasinnan Roman Protasevíts hafa augljóslega verið hræddan, þegar flugstjóri flugvélarinnar tilkynnti að henni yrði lent í Minsk.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.