Innlent

„Mikil ein­eltis­menning hefur ríkt í Ráð­húsinu“

Hallgerður Kolbrún E. Jónsdóttir skrifar
Vigdís Hauksdóttir, borgarfulltrúi Miðflokksins, segir mikla eineltismenningu hafa ríkt í Ráðhúsinu í áratug. 
Vigdís Hauksdóttir, borgarfulltrúi Miðflokksins, segir mikla eineltismenningu hafa ríkt í Ráðhúsinu í áratug.  Vísir/Vilhelm

„Mikil eineltismenning hefur ríkt í Ráðhúsinu allt frá árinu 2010 og spannar því þrjú kjörtímabil. Sá slæmi andi sem einkennt hefur störf borgarráðs og borgarstjórnar kom ekki í Ráðhúsið með þeim aðilum sem sitja í minnihluta nú.“

Þetta segir í bókun Vigdísar Hauksdóttur, borgarfulltrúa Miðflokksins, sem hún lagði fyrir í umræðu um sálfélagslegt áhættumat og starfsumhverfi starfsfólks borgarráðs á borgarráðsfundi í gær. Með bókuninni er Vigdís að bregðast fréttum af uppsögn Helgu Bjargar Ragnarsdóttur, fyrrverandi skrifstofustjóra hjá Reykjavíkurborg, vegna meints eineltis af hálfu Vigdísar. 

Líf og sál kynnti niðurstöður sínar á starfsumhverfi og sálfélagslegu áhættumati fyrir starfsfólk sem mætir fyrir borgarráð í gær. Meðal niðurstaða var það að erfið samskipti á vettvangi borgarráðs hafi gengið mjög nærri starfsmönnum og kjörnum fulltrúum. Þá hafi ekki tekist að tryggja sálfélagslegt öryggi starfsmanna á vettvangi ráðsins.

Kallað var eftir mati á starfumhverfi borgarráðs meðal annars vegna deilna Helgu Bjargar Ragnarsdóttur, fyrrverandi skrifstofustjóra hjá Reykjavíkurborg, og Vígdísar Hauksdóttur. Deilurnar náðu hámarki þegar Helga lagði fram kvörtun þess efnis að Vigdís væri að leggja sig í einelti. Í kjölfarið sakaði Vigdís Helgu um að leggja sig í einelti og fór fram á það að Helga sæti ekki fundi sem Vigdís þyrfti að sitja.

„Þetta eru óboðleg vinnubrögð“

Greint var frá því fyrr í vikunni að Helga hafi verið færð til í starfi að eigin ósk. Sú ósk hafi byggst á deilum hennar og Vigdísar og segist Helga hafa orðið fyrir stöðugu áreiti og ofsóknum af hálfu borgarfulltrúans.

Umræðurnar um málið í gær voru nokkuð harðar og sakaði Vigdís meðal annars embættismann borgarinnar um að hafa rofið trúnað, en kynningin var merkt sem trúnaðarmál í tölvupósti sem barst borgarráðsmönnum þann 8. júní síðastliðinn.

„Þetta eru óboðleg vinnubrögð. Í borgarráði sitja 10 kjörnir fulltrúar og því er haldið fram að kynningin sé ópersónugreinanleg. Það varpar ljósi á þá alvarlegu stöðu að enn er óútkljáð kvörtunarmál vegna þessa máls hjá persónuvernd,“ sagði í annarri bókun Vigdísar.

„Áheyrnarfulltrúi Miðflokksins velur að snúa öllu á haus“

Borgarráðsfulltrúar Samfylkingarinnar, Viðreisnar, Pírata og Vinstri grænna lögðu fram gagnbókun við bókun Vigdísar. Sögðu þeir kolrangt að embættismaður hafi rofið trúnað á niðurstöðunum enda hafi umræddur starfsmaður ekki séð niðurstöðurnar.

„Á Facebook-síðu starfsmannsins stendur: „Í ágúst sl. var greint frá því að gera ætti úttekt á sálfélagslegum áhættuþáttum fyrir það starfsfólk sem situr eða þarf reglulega að taka sæti á fundum borgarráðs í kjölfar ábendinga um starfsumhverfi þess hóps. Ég vona svo sannarlega að kjörnir fulltrúar taki niðurstöður þeirrar úttektar alvarlega og ráðist í nauðsynlegar og löngu tímabærar úrbætur til að tryggja heilnæmt og öruggt starfsumhverfi fyrir okkur öll.“

„Áheyrnarfulltrúi Miðflokksins velur að snúa öllu á haus þrátt fyrir að vera leiðréttur um það sem er satt og rétt,“ sagði í gagnbókun Samfylkingarinnar, Viðreisnar, Pírata og Vinstri grænna.

Vigdís sagði í gagnbókun að eineltismenning innan borgarráðs væri ekki ný af nálinni.

„Um það vitna m.a. upptökur frá fundi borgarstjórnar frá lokum síðasta kjörtímabils þegar einn fráfarandi borgarfulltrúi sá sig knúinn til að upplýsa um eineltismenningu meirihlutans. Einnig er minnt á ummæli annars kjörins fyrrverandi borgarfulltrúa frá kjörtímabilinu 2010-2014 þar sem hann kom fram og greindi frá sjálfsvígshugmyndum sínum vegna grófs eineltis frá meirihlutanum.“


Tengdar fréttir

Hættir á skrif­­stofu borgar­­stjóra vegna Vig­­dísar

Helga Björg Ragnars­dóttir, fyrrum skrif­stofu­stjóri skrif­stofu borgar­stjóra, hefur verið færð til í starfi að eigin ósk. Hún segist hafa orðið fyrir stöðugu á­reiti og of­sóknum af hálfu borgar­full­trúa Mið­flokksins, Vig­dísar Hauks­dóttur. Hún telur að kerfið hafi brugðist sér í málinu.

Skrifstofustjóri borgarstjóra: „Skaðlegt að kjörnir fulltrúar þurfi ítrekað að verjast árásum borgarfulltrúans á mig“

Það er skaðlegt að kjörnir fulltrúar þurfi ítrekað að verjast árásum borgarfulltrúans á mig og annað starfsfólk borgarinnar í stað þess að geta einbeitt sér að því að vinna að góðum málum í þágu borgarbúa. Það er líka skaðlegt fyrir mig, fjölskyldu mína og mína heilsu,“ skrifar Helga Björg Ragnarsdóttir skrifstofustjóri skrifstofu borgarstjóra í færslu á Facebook-síðu sinni.

Vigdís langþreytt og leitar til Vinnueftirlitsins

Vigdís Hauksdóttir borgarfulltrúi Miðflokksins hefur óskað eftir aðstoð Vinnueftirlitsins í deilum sínum við Helgu Björgu Ragnarsdóttur skrifstofustjóra borgarstjóra og Stefán Eiríksson borgarritara.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.