Innlent

Vigdís langþreytt og leitar til Vinnueftirlitsins

Kolbeinn Tumi Daðason skrifar
Vigdís Hauksdóttir stendur í deilum í Ráðhúsi Reykjavíkur.
Vigdís Hauksdóttir stendur í deilum í Ráðhúsi Reykjavíkur. visir/vilhelm

Vigdís Hauksdóttir borgarfulltrúi Miðflokksins hefur óskað eftir aðstoð Vinnueftirlitsins í deilum sínum við Helgu Björgu Ragnarsdóttur skrifstofustjóra borgarstjóra og Stefán Eiríksson borgarritara. Frá þessu greinir borgarfulltrúinn á Facebook.

Deilur þeirra hafa staðið yfir í vel á annað ár en upphaf þess má, að sögn Vigdísar, rekja til dóms í héraði sumarið 2018 þar sem Reykjavíkurborg var dæmd til að greiða starfsmanni Ráðhúss Reykjavíkur skaðabætur vegna slæmrar framkomu Helgu Bjargar og Stefáns í garð starfsmanns.

„Um þá skilyrðislausu hlýðni sem skrifstofustjórinn virðist ætlast til af stefnanda verður sagt það eitt að þrátt fyrir stjórnunarrétt annars og hlýðniskyldu hins eru undirmenn ekki dýr í hringleikahúsi yfirmanna sinna. Að mati dómsins er þessi framkoma skrifstofustjórans í það minnsta óvirðing, ef ekki lítilsvirðing við samstarfsmann, sem er auk þess kynslóð eldri en hún og ætti, þó ekki væri nema vegna starfsreynslu sinnar, tilkall til örlítillar virðingar,“ sagði í niðurstöðu héraðsdóms.

Vigdís segist hafa lesið upp úr dómnum á fundi borgarstjórnar og síðan hafi Helga Björg ráðist að sér í fjölmiðlum og reynt að sverta mannorð sitt.

„Hún ber mig þungum sökum og sakar mig um einelti þrátt fyrir að hafa einungis hitt mig tvisvar eða þrisvar þegar hún setti málið af stað.“

Hafnað að Helga Björg víki af fundi

Starfsfólk hjá Reykjavíkurborg kvartaði undan Vigdísi og framkomu hennar gagnvart Helgu Björgu til eineltis- og áreitnisteymis Ráðhússins. Vigdís hefur kallað teymið „Rannsóknarrétt Ráðhússins“.

„Í þrígang hef ég verið ónáðuð á heimili að kvöldi til - til að taka á móti ábyrgðarbréfum þess efnis að hafin væri rannsókn gegn mér. Meirihlutinn stofnaði rannsóknarrétt ráðhússins mér til höfuðs og reynt var í tvígang að þvæla mér inn í það ólögbundna ferli,“ segir Vigdís.

„Núna er opið mál á hendur mér hjá siðanefnd íslenskra sveitarfélaga sama efnis. Að þessu sögðu er það óásættanlegt fyrir mig að nú er þessi aðili farin að mæta á fundi borgarráðs - hefur það gerst í tvígang og síðast nú í morgun. Hvernig má það vera að hún sækist í að sitja sömu fundi og ég sem er meintur „gerandi og ofbeldismaður“ í málinu.“

Vigdís segist hafa óskað eftir því að Helga Björg víki af fundi en ekki hafi verið við því orðið.

„Allir embættismenn borgarinnar eru með staðgengla - hún líka og samkvæmt öllum eineltisfræðum á hún að forðast að vera í návist minni. Hér er búið að snúa málum við og tel ég að þetta áreiti og ögrun gagnvart mér sé einelti í minn garð.“

Því óski hún eftir aðstoð Vinnueftirlitsins.

Vigdís þakkar sömuleiðis í dag hlustendum Útvarps Sögu fyrir traustið. Í könnun á Útvarpi Sögu, þar sem 649 atkvæði voru greidd á vef útvarpsstöðvarinnar, segjast 58 prósent hlustenda vilja að hún verði næsti borgarstjóri. Vigdís segist þakka traustið og ætla að standa undir væntingum.


Tengdar fréttir

Meint einelti í Ráðhúsinu: Snörp orðaskipti þegar Vigdís og Dóra Björt tókust á í Vikulokunum

Það kom til snarpra orðaskipta á milli Vigdísar Hauksdóttur, oddvita Miðflokksins í borgarstjórn og Dóru Bjartar Guðjónsdóttur, oddvita Pírata í borgarstjórn, Í vikulokunum á Rás 1 í dag þegar talið barst að stöðu mála í Ráðhúsinu eftir að tilkynnt var um vinnslu máls samkvæmt bráðabirgðaverkferli vegna kvartana skrifstofustjóra í ráðhúsinu vegna meints eineltis Vigdísar í hans garð.

Vigdís og Helga hefðu átt að leita til borgarstjóra að mati siðanefndar

Hafi kjörnir fulltrúar eitthvað að athuga við störf starfsmanna sveitarfélaga ættu þeir að leita til framkvæmdastjóra sveitarfélagsins sem um ræðir til þess að koma athugasemdunum á framfæri. Það sama gildir um starfsmenn sveitarfélaga, telji þeir að kjörnir fulltrúar hafi gerst brotlegir við siðareglur, og öfugt

Vigdís hyggst leggja fram nýjar upplýsingar í eineltismáli

Vigdís Haukdsóttir, borgarfulltrúi Miðflokksins, boðar nýjar upplýsingar í máli skrifstofustjóra Reykjavíkurborgar, Helgu Bjargar Ragnarsdóttur, sem sökuð er um að hafa lagt undirmann sinn í einelti. Helga svaraði þeim ásökunum í bréfi til forsætisnefndar Reykjavíkurborgar í dag.

Vigdís ætlar með eineltismálið fyrir dómstóla

Eineltis-og áreitnisteymi Ráðhússins hefur óskað eftir því að sérfræðingar rannsaki hvort Vigdís Hauksdóttir hafi beitt skrifstofustjóra í Ráðhúsinu einelti. Þetta er í fyrsta skipti sem slík rannsókn er fyrirhuguð.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.