Bíó og sjónvarp

Chris Harrison hættur í The Bachelor

Árni Sæberg skrifar
Chris Harrison var þáttastjórnandi The Bachelor í tæp tuttugu ár.
Chris Harrison var þáttastjórnandi The Bachelor í tæp tuttugu ár.

Chris Harrison er hættur sem stjórnandi raunveruleikaþáttanna The Bachelor en hann hefur stýrt þáttunum allt frá fyrsta þætti sem kom út árið 2002.

Harrison dró sig í hlé frá þáttunum í febrúar síðastliðnum eftir að hafa fengið mikla gagnrýni fyrir að verja fyrrum keppanda sem sakaður var um kynþáttafordóma.

Rachael Kirkconnell, fyrrum keppandi í the Bachelor, var sökuð um kynþáttafordóma í byrjun árs þegar myndir af henni í háskólapartýi árið 2018 komu upp á yfirborðið. Þema partýsins virðist hafa verið „plantekra í Suðurríkjunum.“ Eðli málsins samkvæmt varð Kirkconnell fyrir miklu aðkasti vegna myndanna og neyddist til að gefa út formlega afsökunarbeiðni.

Chris Harrison fannst illa vegið að Kirkconnell og kom henni til varnar opinberlega. Hann sagði málið smávægilegt og að gagnrýni sú sem Kirckonnell hafði mátt sæta væri ósanngjörn.

Aðdáendur The Bachelor tóku uppátæki Harrisons illa og neyddist hann til að stíga tímabundið til hliðar frá þáttunum. Flestum mátti þó vera ljóst að dagar hans, sem stjórnandi þáttanna, væru liðnir. 

Nú hefur Harrison formlega hætt störfum en í frétt Deadline um málið segir að starfslokasamningsviðræður hans við framleiðendur þáttanna hafi verið langar og strembnar. 

Lögmaður Harrisons, Bryan Freedman, hafi hótað að ljóstra upp öllu því slæma sem gerst hefur á bak við tjöldin við framleiðslu The Bachelor. Blaðamaður Deadline fullyrðir að starfslokagreiðsla Harrison hlaupi á tugum milljónum dollara.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.