Fjörutíu sjúkraflutningar tengdir hópsmitinu

Kristín Ólafsdóttir skrifar 5. júní 2021 10:24

Covid-flutningar eru með sérstöku sniði en sjúkraflutningamenn þurfa að klæða sig upp í sóttvarnagalla. Vísir/vilhelm

Mikið var að gera hjá slökkviliði höfuðborgarsvæðisins síðasta sólarhringinn en sjúkraflutningar á tímabilinu voru 160, sem er með því almesta sem gerist. Um fjörutíu flutningar tengjast hópsýkingu kórónuveirunnar á höfuðborgarsvæðinu, sem greint var frá í gær.

Guðjón Ingason varðstjóri hjá slökkviliði höfuðborgarsvæðisins segir að flytja hafi þurft fólk tengt smitinu í sóttvarnahús á Rauðarárstíg. Mbl greindi fyrst frá.

„Minnihlutinn var staðfest smit en meirihlutinn var þegar í sóttkví og þetta var í raun og veru bara til að halda fjarlægðinni milli herbergja,“ segir Guðjón. Hann kveðst ekki muna hvenær sjúkraflutningar voru svo margir á einum sólarhring en það hafi líklega verið í haust í fyrri bylgju veirunnar. Fyrir utan tíða sjúkraflutninga hafi síðasti sólarhringur verið með hefðbundnum hætti.

Sjö greindust með kórónuveiruna innanlands í fyrradag og voru allir utan sóttkvíar. Um er að ræða hópsmit hjá hælisleitendum á höfuðborgarsvæðinu. Þórólfur Guðnason sóttvarnalæknir sagði í gær að einhver smitanna kynnu að vera gömul en öruggt væri að fjögur eða fimm væru nú. Smit í Hvaleyrarskóla í Hafnarfirði gæti tengst málinu.

Faraldur kórónuveiru (COVID-19) Sjúkraflutningar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.