Handbolti

Bjarki Már bikar­meistari eftir sigur á læri­sveinum Guð­mundar

Runólfur Trausti Þórhallsson skrifar
Bjarki Már [númer 4] og liðsfélagar hans í Lemgo urðu í dag þýskir bikarmeistarar í handbolta.
Bjarki Már [númer 4] og liðsfélagar hans í Lemgo urðu í dag þýskir bikarmeistarar í handbolta. Lemgo

Landsliðsmaðurinn Bjarki Már Elísson varð í dag þýskur bikarmeistari í handbolta er lið hans Lemgo lagði Melsungen að velli í úrslitum. Landsliðsþjálfarinn Guðmundur Guðmundsson er þjálfari Melsungen og þá leikur Arnar Freyr Arnarsson með liðinu.

Bjarki Már og félagar í Lemgo unnu ævintýralegan sigur á Kiel í undanúrslitum þar sem liðið kom til baka og tryggði sér eins marks sigur. Bjarki Már var markahæstur í þeim leik með sjö mörk.

Úrslitaleikurinn sjálfur var ekki alveg jafn dramatískur. Lemgo var í raun alltaf með yfirhöndina og þó fyrri hálfleikur hafi verið nokkuð jafn var munurinn samt þrjú mörk er flautað var til hálfleiks, staðan þá 15-12 Lemgo í vil.

Það hægðist á sóknarleik beggja liða í síðari hálfleik enda annar leikurinn á tveimur dögum og lappir orðnar þreyttar eftir langt tímabil. Lemgo lét þó aldrei af forystu sinni og vann á endanum síðari hálfleikinn með eins marks mun og leikinn þar með fjögurra marka mun, lokatölur 28-24 Lemgo í vil.

Bjarki Már þar af leiðandi orðinn bikarmeistari á meðan Guðmundur og Arnar Freyr þurfa að bíta í það súra epli að lenda í öðru sæti. 

Íslenski hornamaðurinn var heldur rólegur í tíðinni í dag - miðað við oft áður - en Bjarki skoraði fjögur mörk í leiknum. Arnar Freyr komst ekki á blað hjá Melsungen.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.