Gosfólkið hámar í sig pylsurnar í stórum stíl

Jakob Bjarnar skrifar 7. maí 2021 13:20

Loksins er komin þjónusta við gosstöðvarnar. Svangir ferðalangar kunna vel að meta það að geta fengið sér eitthvað í gogginn og heitt í kroppinn eftir göngu að eldgosinu. vísir/vilhelm

Slysavarnadeildin Þórkatla hefur komið upp sölugámi, sem kallast Ellubúð, við göngustíginn, sem liggur að gosstöðvunum við Fagradalsfjall og hefur algerlega slegið í gegn.

Guðrún Kristín Einarsdóttir, formaður slysavarnadeildarinnar Þórkötlu, segir að það hafi staðið lengi til að koma upp einhverri þjónustu en vegna anna hafi það ekki verið fært en á miðvikudag var þetta drifið upp. Rólegra hefur verið að undanförnu og þá fékkst mannskapur til að sinna þessu verkefni.

„Já, það hefur verið mikið að gera. Fólk er að átta sig á því hvað er í gangi. Mest er að gera hjá okkur frá klukkan 11 að kvöldi og allt til klukkan hálf tvö þegar fólk er að koma niður af fjallinu. Þá er mesta traffíkin,“ segir Guðrún Kristín.

Ljósmyndari Vísis kann vel að meta þjónustuna og hann vippaði sér inn fyrir afgreiðsluborðið í gær og hitti þar fyrir Sigrúnu Stefánsdóttur, Guðfinnu Einarsdóttur og Emmu Geirsdóttur en Sigrún og Emmar eru stjórnarkonur í Þórkötlu.vísir/vilhelm

Pylsur og kaffi er það sem fólkið vill

Vísir ræddi við Adolf Inga Erlingsson fararstjóra í vikunni sem telur einsýnt að eldgosið hafi og muni hafa aðdráttarafl á ferðamenn af áður óþekktri stærðargráðu. Guðrún Kristín segir að þau vilji mæta því. En hvað er svo á boðstólum í sölugámnum?

„Við erum með pulsur og samlokur, gos, kaffi og súkkulaði. Og erum að gæla við þá hugmynd að bæta við kakói. Það er mikið um það spurt.“

Ekkert slær þó pylsur og svo kaffi út í vinsældum. „Ég veit ekki hvað við erum búin að selja margar pylsur. Þær eru langvinsælastar og alveg ótrúlegt hvað er hægt að borða af pylsum.“

En er þetta ekki á uppsprengdu verði?

„Jú. Við ætlum að mokgræða á landanum. Neinei, við reynum að stilla verðinu í hóf en þetta er náttúrlega fjáröflun fyrir okkur og björgunarsveitina, en við reynum að vera ekki með verðið of hátt.“

Jenný Lovísa Árnadóttir og Sigrún voru kátar á vaktinni. Kók og súkkulaði gengur vel í mannskapinn sem kemur til að skoða gosið en vinsælast er kaffið og pylsurnar sem renna ofan í mannskapinn.vísir/vilhelm

Búðin heitir í höfuðið á Elínu Pálfríði

Það liggur fyrir að þetta eru langar vaktir sem þarf að standa og langt inn í nóttina. Þess vegna hefur ekki opnað fyrr en klukkan átta að kvöldi en að sögn Guðrúnar Kristínar stendur til að opna klukkan fjögur bæði á laugardaginn og sunnudag.

En af hverju heitir búðin Ellubúð? Að sögn Guðrúnar Kristínar kom ekkert annað til greina.

„Það er af því að konan sem gaf okkur gáminn hét Elín Pálfríður Alexandersdóttir, en hún er nú látin. Hún var ein af stofnendum Þórkötlu, deildarinnar. Hún var kölluð Ella og við skírðum gáminn Ellubúð eftir henni. Ekkert annað í stöðunni en að nefna gáminn í höfuðið á henni.“

Eldgos í Fagradalsfjalli Grindavík Björgunarsveitir Verslun Ferðamennska á Íslandi

Tengdar fréttir

Adolf Ingi endurráðinn og farinn á flakk með ferðamenn á ný

Adolf Ingi Erlingsson ökuleiðsögumaður fór sinn fyrsta leiðangur með ferðamenn í gær. Hann segir að eldgosið sé og eigi eftir að reynast gríðarlegt aðdráttarafl.

5. maí 2021 11:24

Jörð með gjósandi eldfjalli fæst keypt fyrir rétt verð

Núna er hægt að kaupa gjósandi eldfjall. Landeigendur gosstöðvanna í Fagradalsfjalli segja jörðina eða hluta hennar fala fyrir rétt verð og eru þegar komnir með tilboð.

6. maí 2021 21:41

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.