Innlent

Sóttu að Bjarna og skilja ekkert í breyttum viðmiðum

Kolbeinn Tumi Daðason skrifar
Bjarni á leið á blaðamannafundinn í Hörpu í gær sem þingmönnum þótti sumum hverjum illskiljanlegur.
Bjarni á leið á blaðamannafundinn í Hörpu í gær sem þingmönnum þótti sumum hverjum illskiljanlegur. Vísir/Vilhelm

Hart var sótt að Bjarna Benediktssyni fjármálaráðherra á Alþingi í dag þegar þingmenn mættu í pontu hver á fætur öðrum og sögðu að blaðamannafundur ríkisstjórnarinnar í gær um ráðstafanir á landamærunum hefði verið illskiljanlegur.

„Fundurinn þótti frekar ruglingslegur og skildi fólk eftir með fleiri spurningar en svör,“ sagði Logi Einarsson, formaður Samfylkingarinnar, í óundirbúnum fyrirspurnatíma á Alþingi í dag. 

Nokkrir þingmenn lýstu furðu sinni yfir því að ríkisstjórnin hefði ákveðið að breyta viðmiði yfir farþega sem verður skylt að fara í sóttvarnahús við komuna til landsins. Sóttvarnalæknir lagði til strangara viðmið þegar heilbrigðisráðherra lagði fram fyrri reglugerð um sóttvarnahús sem var síðar dæmd ólögmæt. 

Nýju reglurnar kveða á um skyldudvöl í sóttkví fyrir farþega frá löndum þar sem nýgengi smita er þúsund á hverja hundrað þúsund íbúa. Sóttvarnalæknir segir viðmiðin ekki frá sér komin.

Verri staða en lægri viðmið

Logi beindi fyrirspurn sinni til Bjarna Benediktssonar fjármálaráðherra og spurði hvers vegna hertar aðgerðir væru miðaðar við nýgengi smita yfir 750 á hverja 100 þúsund en ekki 500 eins og miðað var við í þriggja vikna gamalli reglugerð um sóttvarnahús, sem stóðst svo ekki lög.

Logi Einarsson, formaður Samfylkingarinnar, telur Samfylkinguna hafa gefið ríkisstjórninni nauðsynlegt spark í rassinn.Vísir/Vilhelm

„Í dag er staðan talsvert verri en samt tilkynnir ríkisstjórnin að hækka eigi fjöldaviðmið svo mikið að nánast ekkert land í Evrópu er skilgreint sem hááhættusvæði,“ sagði Logi. Ekkert Evrópuland nema mögulega San Marínó sé skilgreint með fleiri en 1000 smit á 100 þúsund íbúa sem skikki fólk í sóttvarnahús.

Inga Sæland, formaður Flokks fólksins og Jón Steindór Valdimarsson, þingmaður Viðreisnar, höfðu einnig á orði að fundurinn hefði verið ruglingslegur.

Bjarni tiltók ýmsar aðgerðir sem gripið hafi verið til á landamærum undanfarna mánuði eftir því sem tilefni hafi þótt til. Skimanir hjá bólusettufólki á landamærum og tvöföld skimun með sóttkví á milli hjá fólki með neikvætt-PCR próf.

Fjögur lönd falla undir

„Það er rangt að engin lönd falli innan þeirra viðmiðunarmarka,“ sagði Bjarni og tiltók Pólland, Holland, Frakkland og Ungverjaland.

„Þarna gildir ófrávíkjanleg regla, ekki nema nauðsynlegar ferðir og engar undanþágur frá sóttvarnahótelinu.“

Fyrir aðra gildi sú meginregla að fara á sóttvarnahótel. Undanþágu þurfi til að komast hjá því en fram hefur komið að sækja þarf um slíka undanþágu með tveggja sólarhringa fyrirvara áður en komið er til landsins. Þar þarf að greina frá trúverðugum áformum um dvöl í fullnægjandi húsnæði. Ekki liggur fyrir hvernig áform verði metin trúverðug.

Bjarni Benediktsson telur Loga Einarsson vera að misskilja aðgerðir ríkisstjórnarinnar.Vísir/vilhelm

Logi benti á að ekkert af löndunum fjórum hefði nýgengi yfir 1000. Eina landið þar sem fólk yrði að fara á sóttkvíarhótel væri San Marínó samkvæmt skilgreiningu stjórnvalda. Bjarni skildi ekki eigin sinni aðgerðirnar sjálfur.

„Ég heyri að háttvirtur þingmaður telji að ég misskilji eitthvað. En ég tel að það sé öfugt farið,“ sagði Bjarni.

Ástæðan væri sú að einstök svæði í þeim löndum væri með nýgengi yfir 1000 á hverja 100 þúsund íbúa. Miðað væri við versta svæði í hverju landi. Það sé tilfellið í löndunum fjórum.

„En þetta getur auðvitað breyst yfir tíma. Hugmyndin er að uppfæra viðmiðunartölur varðandi þetta vikulega hér innanlands.“

Vonast til að geta aflétt með öllu eftir sex vikur

Fylgst verði með þróuninni en lykilatriði sé að fá skjól á landamærum til að geta hafist handa við afléttingar innanlands. 

Bjarni svaraði ekki þeim hluta spurningar Loga hvers vegna viðmiðunartölur hefðu hækkað frá því sem var þegar miða átti við 500 smit á hverja 100 þúsund íbúa. 

Katrín Jakobsdóttir forsætisráðherra var spurð að því í kvöldfréttum Stöðvar 2 í gær hvort ekki hefði verið hægt að tryggja landamærin enn betur með allsherjarskyldu. 

„Við getum reist okkur gríðarlega ýtarlegt regluverk en það verður mjög erfitt að koma í veg fyrir að það sé aldrei neinn sem brjóti þær reglur.“

Fram kom á vef stjórnarráðsins í gær að öllum afléttingum gæti verið létt eftir sex vikur þegar stærstur hluti fullorðinna Íslendinga hefur fengið að minnsta kosti einn skammt af bóluefni.

Viðmið ekki komin frá Þórólfi

Þórólfur Guðnason, sóttvarnalæknir sagði á upplýsingafundi í dag að hann hefði ekki ráðlagt stjórnvöldum að setja þetta nýja viðmið. Hann lagði til að miðað yrði við nýgengi upp á 500 í aðdraganda þess að reglugerðin um sóttvarnahús var sett fyrir nokkrum vikum.

„Nei þessi tala er ekki komin frá mér. Ég held það sé margt óljóst ennþá hvernig frumvarpið verður og hvernig það verður endanlega afgreitt; hvort þessi tala verður inni í frumvarpinu en hvort sóttvarnalækni verði falið að skilgreina þessi áhættulönd, það verður bara að koma í ljós.“

Síðdegis birti sóttvarnalæknir svo lista yfir þau lönd sem hann telur að séu með nýgengi smita yfir 750 annars vegar og 1000 hins vegar. Þau má sjá að neðan.

Fólk sem kemur frá löndunum í vinstri dálkinum þurfa eins og staðan er núna að fara í sóttvarnahús, stundum nefnt sóttkvíarhótel, við komuna til landsins. Fólk frá löndunum í hægri dálkinum getur sótt um undanþágu frá meginreglunni sem er dvöl í húsinu.


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.