Golf

Dustin Johnson talinn líklegastur til að klæðast græna jakkanum annað árið í röð

Hjörtur Leó Guðjónsson skrifar
Dustin Johnson er talinn líklegur til að vinna mótið annað árið í röð.
Dustin Johnson er talinn líklegur til að vinna mótið annað árið í röð. Mike Ehrmann/Getty Images

Masters mótið í golfi hefst í kvöld og þrátt fyrir að aðeins fimm mánuðir séu síðan Dustin Johnson sigraði mótið í fyrra er mikil eftivænting fyrir mótinu í ár. Þetta er í 85. sinn sem mótið er haldið á Augusta National vellinum og Johnson er talinn líklegur til að verja titilinn.

Dustin Johnson fór með sigur af hólmi á þessu stærsta móti ársins í fyrra. Mótið var spilað mun seinna en vanalega vegna kórónuveirufaraldursins, en Johnson er talinn líklegur til að klæðast græna jakkanum annað árið í röð.

Dustin Johnson vann mótið í fyrra með fimm högga forystu á Sungjae Im og Cameron Smith sem voru næstu menn og ef marka má færslur hans á samfélagsmiðlum er hann spenntur að komast aftur á völlinn.

Leynivopn DeChambeaus

Bryson DeChambeau, sem var talinn líklegastur til að vinna mótið í fyrra, segist vera með leynivopn í pokanum í ár. Í fyrra talaði hann um að hann liti á Augusta völlinn sem par 67 en ekki par 72, en endaði svo 18 höggum á eftir Dustin Johnson.

„Ég er með smá í pokanum þessa vikuna sem mun koma að góðum notum,“ sagði DeChambeau. „Ég ætla ekki að fara út í nein smáatriði, en þetta hefur verið í bígerð í nokkur ár og ég er mjög spenntur fyrir því.“

DeChambeau er þó ekki viss um að þetta leynivopn muni skila honum sigri.

„Þetta er golf og maður veit aldrei hvað gerist, en miðað við hvað ég haf séð seinustu vikuna á æfingum þá ar augljóst að þetta hefur mikla kosti í för með sér.“

Heimildir herma að leynivopnið sé driver með 4,5 gráðu halla, en flestir atvinnukylfingar eru með níu til tíu gráðu halla á sínum kylfum.

Upprisa Spieth

Jordan Spieth er einn af þeim sem er talinn sigurstranglegur á Masters mótinu í ár. Spieth bar sigur sigur úr bítum á Texas Open mótinu seinasta sunnudag, en það var fyrsti sigur hans síðan í júlí 2017.

Jordan Spieth hefur alltaf verið í miklu uppáhaldi hjá golfaðdáendum, en svo virtist sem hann væri búinn að missa taktinn algjörlega. Spieth féll af listanum yfir efstu 100 kylfinga heims og fór í gegnum 1.351 dag án sigurs.

Sigurinn á Texas Open mótinu var tólfti sigur hans á ferlinum. Sigurinn gæti þýtt það að Jordan Spieth sé mættur aftur í sitt besta form og er nú meðal þeirra þriggja sem taldir eru líklegastir til að vinna Masters mótið.

Augusta Masters mótið verður í beinni útsendingu á Stöð 2 Golf í kvöld og hefst útsending frá fyrsta degi klukkan 19:00.


Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.


Tengdar fréttir

Masters-mat­seðill John­son klár

Þó aðeins séu fjórir mánuðir síðan Dustin Johnson vann Masters-mótið í golfi sem átti upphaflega að fara fram á svipuðum tíma í fyrra þá heldur Johnson í hefðina og hefur nú tilkynnt Masters-matseðil ársins.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.