Innlent

Þingmenn fóru inn á lokað svæði sem vísindamenn

Snorri Másson skrifar
Steingrímur J. Sigfússon við gosstöðvarnar í Fagradalsfjalli í gær, á svæði lokuðu almenningi.
Steingrímur J. Sigfússon við gosstöðvarnar í Fagradalsfjalli í gær, á svæði lokuðu almenningi. Facebook/Ari Trausti

Ari Trausti Guðmundsson, þingmaður Vinstri grænna, og Steingrímur J. Sigfússon, forseti Alþingis, fóru að gosstöðvunum í Fagradalsfjalli í gær þegar svæðið var lokað almenningi. Vísindamenn og fjölmiðlamenn fengu aðgang að svæðinu eftir að því var lokað vegna hættu á nýjum sprungum.

Ari Trausti og Steingrímur töldust því vísindamenn á svæðinu en þeir eru báðir menntaðir jarðvísindamenn.

Ari hefur þó lagt sýnu meiri stund á vísindin en Steingrímur, sem útskrifaðist með B.S.-gráðu 1981 og starfaði síðast við jarðfræðistörf 1982-83. Ari er með meistarapróf í jarðvísindum og hefur ritað fjölda greina og rita á því sviði.

Ari Trausti Guðmundsson er með bók um íslensk eldgos á ensku í vinnslu.Ragnar Th. Sigurðsson

40 ára gamlar BA-gráður í jarðfræði

Ari Trausti segir í samtali við Vísi að ferð þeirra þingbræðra inn á lokað svæðið hafi öll verið í samvinnu við viðeigandi yfirvöld. „Við vorum þarna með fullu leyfi lögreglustjóra og björgunarsveita og í fylgd þeirra,“ segir Ari. 

Þingmennirnir hafa sætt gagnrýni, enda vafalaust margir svekktir sem fengu ekki að fara inn á svæðið eftir lokunina í gær.

Sóley Tómasdóttir, fyrrverandi borgarfulltrúi Vinstri grænna, sagði á Twitter að þingmenn í „vísindaskyni“ á lokuðu svæði minnti óneitanlega á ráðherrann sem sletti úr klaufunum á „sölusýningu.“ Þar var hún trúlega að vísa til máls Bjarna Benediktssonar fjármálaráðherra í Ásmundarsal á Þorláksmessu.

Óskar Steinn Ómarsson, fyrrverandi ritari Samfylkingarinnar, gerði athugasemd við færslu Ara Trausta á Facebook: „Er svæðið lokað öllum almenningi nema þingmönnum með 40 ára gamlar BA-gráður í jarðfræði? Eða hafa þingmennirnir kannski skipt um starfsvettvang?“

Sævar Helgi Bragason, Stjörnu-Sævar, segir „fullkomlega óþolandi“ að svæðið sé lokað fyrir suma, en ekki alla.  Hinir útvöldu séu greinilega ekki í sömu hættu og aðrir á svæðinu.

Eðlilegt að gosstöðvarnar hafi verið lokaðar almenningi

Ari segir þessa gagnrýni ekki svaraverða en segir engan vafa um að þeir hafi verið á staðnum í vísindaskyni. 

„Ég er búinn að skrifa bók um íslenskar eldstöðvar á ensku sem átti að koma út núna þegar Covid-19 hófst. Þá var hún sett á salt en var tilbúin til prentunar. Þegar umbrotin byrjuðu núna var ákveðið að byrja ekki að prenta hana fyrr en búið væri að bæta við hana nýjum kafla. Þá þarf að útvega nýjar myndir og nægan texta. Það kalla ég vísindi,“ segir Ari Trausti.

Um Steingrím segir Ari Trausti: „Hann er náttúrulega jarðvísindamaður svo sem og ætlaði að kynna sér aðstæður þarna í krafti síns embættis.“ 

Steingrímur er síðan sem forseti Alþingis handhafi forsetavalds í fjarveru forseta Íslands. Forseti Íslands fékk einmitt far með þyrlu Landhelgisgæslunnar að gosstöðvunum í upphafi eldgoss. 

Steingrímur var tekinn tali á gossvæðinu af fréttamanni Stöðvar 2 og má sjá viðtalið í fréttinni að neðan.

Með Ara og Steingrími í för voru Einar Sæmundsen þjóðgarðsvörður á Þingvöllum og Valdimar Leifsson leikstjóri. Einar hefur sótt fundi almannavarna vegna hættustigs á suðvesturhorni landsins og ferð hans tengdist að sögn Ara því starfi. Valdimar er að safna kvikmyndaefni frá staðnum.

„Það er mjög eðlilegt að þessi fyrsti gosstaður hafi verið lokaður almenningi enda fór það svo að gossprunga opnaðist á milli svæðanna tveggja. Þá er mikill munur á því hvort 20 manns séu að athafna sig í Meradölum og að hundruð eða þúsundir manna séu á öllu svæðinu,“ segir Ari Trausti.

Ari Trausti Guðmundsson og Steingrímur J. Sigfússon í heimsókn hjá Slysavarnadeildinni Þórkötlu í Grindavík.Slysavarnadeildin Þórkatla


Tengdar fréttir

Gosstöðvarnar verða opnaðar að nýju í fyrramálið

Bogi Adolfsson hjá björgunarsveitinni Þorbirni í Grindavík segir útlitið á gosstöðvunum ágætt ef frá er talin gasmengun á svæðinu. Lögreglustjórinn á Suðurnesjum hefur ákveðið að opna aftur fyrir umferð fólks um svæðið í fyrramálið.

Önnur sprunga gæti opnast

Náttúruvársérfræðingur á Veðurstofunni segir hættu á að fleiri sprungur opnist meðfram sprungunni sem opnaðist við Meradali í gær. 

Lokað fyrir umferð að gosstöðvunum í dag

Vegna veðurs verður lokað fyrir umferð að gosstöðvunum í Geldingadölum í dag. Þetta kom fram í tilkynningu frá lögreglunni á Suðurnesjum í gær og stendur enn, að sögn Gunnars Schram yfirlögregluþjóns.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.