Auður og Floni gefa út fjögur ný lög saman á föstudag

Auk lagsins Týnd og einmanna bætast við fjögur ný lög á þessari stuttskífu. Þau kallast Að morgni, Andartak, Ástin handan við og það síðasta heitir Ég skal kyssa örin þín.

„Venus samtvinnar sögur Auðar og Flona, rannsakar líðan þeirra, segir frá ástarævintýrum og gefur hlustanda tækifæri til þess að heyra hvernig þeir vinna saman og draga fram það besta í hvorum öðrum. Venus er einstakt tónverk að því leiti að hér mætast tveir ólíkir tónlistarstílar Auðar og Flona,“ segir um stuttskífuna.

Venus er verkefni sem varð algjörlega nátturulega til. Við erum báðir nátthrafnar og stóðum saman næturvaktina í stúdíóinu. Við skiptumst á að pródúsera, semja texta, þróa hugmyndir og kasta boltanum á milli, segir Floni

Ásamt þeim Flona og Auði spilar Magnús Jóhann Ragnarsson inná nær öll lögin. Söngkonan Gugusar spilar og syngur einnig í einu lagi.

„Venus er afrakstur þess að við tveir samstillum okkur í að segja sögur og mála myndir með tónlistinni. Rannsakandi eigin líðan og hvernig hún endurspeglast hjá hvorum öðrum. Með því að vinna sem hópur styrkjum og skerpum við það sem gerir okkur einstaka,“ segir Auður.

Hér fyrir neðan má hlusta á lagið Týnd og einmanna.