Innlent

Fimmtán skjálftar yfir þremur í nótt

Sunna Kristín Hilmarsdóttir skrifar
Langflestir skjálftar næturinnar eiga upptök sín við Fagradalsfjall.
Langflestir skjálftar næturinnar eiga upptök sín við Fagradalsfjall. Vísir/Vilhelm

Alls hafa um 750 skjálftar mælst á Reykjanesskaga frá því á miðnætti í nótt. Þar af hafa fimmtán skjálftar verið yfir þremur að stærð og sá stærsti fjórir að stærð.

Það hefur því ef til vill lítið verið um svefnfrið í Grindavík og nágrenni en stærsti skjálfti næturinnar varð klukkan 00:58 á 5,4 kílómetra dýpi 3,2 kílómetra suður af Fagradalsfjalli.

Þá varð skjálfti að stærð 3,9 klukkan 03:51 sem átti upptök sína á fjögurra kílómetra dýpi tvo kílómetra suður af Fagradalfjalli. Hann fannst vel á Suðurnesjum en einnig á höfuðborgarsvæðinu.

Einar Hjörleifsson, náttúruvársérfræðingur á Veðurstofu Íslands, segir að langflestir skjálftar næturinnar séu við Fagradalsfjall.

Hann segir aðspurður engan óróa hafa mælst í nótt.

„En það hefur verið dálítið mikil skjálftavirkni engu að síður og dálítið margar skjálftar yfir þremur,“ segir Einar.

Þá er ekki enn byrjað að gjósa á svæðinu; Einar segir ekkert sjást á vefmyndavélum Veðurstofunnar eða neitt stökk á GPS-mælum en mjög vel sé fylgst með öllum mælum.

Eldgos og jarðhræringar Jarðhræringar á Reykjanesi
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið