Golf

Var of hræddur til að tala við Tiger en tók við bikarnum frá honum

Ingvi Þór Sæmundsson skrifar
Max Homa við hlið hetjunnar sinnar, Tiger Woods, eftir sigurinn á Genesis In
Max Homa við hlið hetjunnar sinnar, Tiger Woods, eftir sigurinn á Genesis In getty/Brian Rothmuller

Max Homa, þrítugur Bandaríkjamaður, hrósaði sigri á Genesis Invitational á PGA-mótaröðinni í gær. Hann hafði betur gegn Tony Finau í bráðabana og vann mótið fyrir framan hetjuna sína, Tiger Woods.

Þetta var annar sigur Homas á PGA-mótaröðinni en hann vann Wells Fargo Championship fyrir tveimur árum.

Sam Burns var með forystu fyrir lokahringinn á Genesis Invitational en missti svo taktinn. Homa kom sér þá í stöðu til að vinna en klikkaði á pútti sem hefði getað tryggt honum sigurinn.

Homa þurfti því að fara í bráðabana gegn Finau. Upphafshögg hans á fyrstu holu bráðabanans fór í tré en hann náði samt pari, líkt og Finau. Homa lék aðra holu bráðabanans á pari á meðan Finau fékk skolla. Homa gat fagnað sigrinum eftir að Finau klikkaði á pútti.

Homa var svekktur með að klúðra púttinu á lokaholunni á meðan hetjan hans og gestgjafi mótsins, sjálfur Tiger Woods, fylgdist með.

Klippa: Homa vann fyrir framan Tiger

„Ég gæti þurft að biðja hann afsökunar. Þú átt ekki að klúðra svona pútti fyrir framan Tiger Woods en ég kláraði þetta og er stoltur af því. Ég og mitt fólk töluðum um að spila eins og Tiger í dag. Og ég gerði það. Ég var ekki með skolla í dag,“ sagði Homa sem tók svo við sigurlaununum frá Tiger.

„Ég sá Tiger um daginn en var of hræddur til að tala við hann. En hann þarf að tala við mig í dag svo þetta verður frábært augnablik.“

Homa lék samtals á tólf höggum undir pari á Genesis Invitational. Hann lék á fimm höggum undir pari á lokahringnum en Finau lék best allra, á sjö höggum undir pari.

Fyrir sigurinn á Genesis Invitational fékk Homa tæplega 1,7 milljón Bandaríkjadala eða rúmlega 215 milljónir íslenskra króna.


Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.