Viðskipti innlent

Nýr loðnukvóti ávísun á yfir tíu milljarða króna gjaldeyristekjur

Kristján Már Unnarsson skrifar
Ægir Páll Friðbertsson, framkvæmdastjóri Brims hf., í beinni útsendingu í fréttum Stöðvar 2 í kvöld.
Ægir Páll Friðbertsson, framkvæmdastjóri Brims hf., í beinni útsendingu í fréttum Stöðvar 2 í kvöld. Sigurjón Ólason

Hafrannsóknastofnun leggur til að loðnukvótinn tvöfaldist frá því sem áður var búið að gefa út, samkvæmt nýrri ráðgjöf sem birt var í kvöld. Ægir Páll Friðbertsson, framkvæmdastjóri Brims hf., segir varlega áætlað verðmæti þess sem fellur í hlut íslenskra skipa vel yfir tíu milljarðar króna í útflutningsverðmæti.

Hafrannsóknastofnun leggur til að í stað 61 þúsund tonna verði leyfður loðnuafli á vertíðinni 127.300 tonn. Í fréttum Stöðvar 2 í kvöld var áætlað að í hlut Íslendinga kæmu um það bil 70 þúsund tonn. Áætla má að norsk, grænlensk og færeysk skip fái tæp 60 þúsund tonn.

„Við fögnum þessari aukningu og líka því sérstaklega að nú sé loksins búið að leyfa loðnuveiðar eftir tvö loðnuleysisár, þó að á sama tíma séum við með tárin í augunum yfir því hversu stór hluti loðnukvótans fer til annarra þjóða,“ segir Ægir Páll.

-En hversu verðmæt eru þessi 70 þúsund tonn sem fara í íslensk skip?

„Ég held að svona varlega áætlað gæti það verið vel yfir tíu milljarðar í útflutningsverðmæti.“

Uppsjávarveiðiskip Brims, Víkingur og Venus, hafa legið í Sundahöfn í Reykjavík meðan beðið hefur verið  niðurstöðu fiskifræðinga.Arnar Halldórsson

Uppsjávarveiðiskip Brims, Víkingur og Venus, hafa legið bundin við bryggju í Sundahöfn í Reykjavík undanfarnar tvær vikur. En þýðir þetta að þau fari strax til loðnuveiða á morgun?

„Nei. Við munum meta það. Við munum leitast við að veiða kvótann okkar á þeim tíma sem loðnan er verðmætust og við munum meta það eftir markaðsaðstæðum og hrognafyllingu loðnunnar.“

-Er það þá kannski um miðjan febrúar?

„Já, ég myndi áætla það. Innan tíu daga,“ svarar Ægir Páll Friðbertsson, framkvæmdastjóri Brims.

Hér má sjá frétt Stöðvar 2:


Tengdar fréttir

Hafrannsóknastofnun leggur til tvöföldun loðnukvótans

Hafrannsóknastofnun birti nú í kvöld nýja ráðgjöf á loðnuveiðar á grundvelli þeirra upplýsinga sem fengust úr loðnuleitinni í síðustu viku. Samkvæmt henni ráðleggur stofnunin að loðnukvótinn rétt rúmlega tvöfaldist, hækki úr 61 þúsund tonnum, sem áður var búið að gefa út, upp í 127.300 tonn.

Fyrstu loðnunni landað á Íslandi eftir þriggja ára hlé

Grænlenska skipið Polar Amaroq landaði tæplega 700 tonnum af frystri loðnu á Eskifirði um helgina. Þessi loðnulöndun markar tímamót því hún er sú fyrsta hér á landi í tæplega þrjú ár. Loðnan veiddist úr kvóta Grænlendinga á Íslandsmiðum.

Fundu loðnu mjög víða við landgrunnsbrúnina

Umfangsmestu loðnuleit til þessa á Íslandsmiðum lýkur í kvöld þegar rannsóknarskipið Árni Friðriksson klárar síðasta leitarlegg sinn á Víkurál, syðst á Vestfjarðamiðum, djúpt vestur af Kollsvík. Tvö rannsóknaskip Hafrannsóknastofnunar og sex fiskiskip frá útgerðum stefna síðan öll til lands og tvö þegar lögst að bryggju.

Klárir að taka loðnunótina um borð og halda til veiða

Skipstjórinn sem fann þykkar loðnutorfur á Austfjarðamiðum um helgina segir áhöfnina tilbúna að hefja veiðar. Búist er við að það skýrist á morgun hvort Hafrannsóknastofnun gefi grænt ljós á loðnuvertíð.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×