Viðskipti innlent

Fundu loðnu mjög víða við landgrunnsbrúnina

Kristján Már Unnarsson skrifar
Rannsóknaskipið Árni Friðriksson, flaggskip Hafrannsóknastofnunar.
Rannsóknaskipið Árni Friðriksson, flaggskip Hafrannsóknastofnunar. Stöð 2/Friðrik Þór Halldórsson.

Umfangsmestu loðnuleit til þessa á Íslandsmiðum lýkur í kvöld þegar rannsóknarskipið Árni Friðriksson klárar síðasta leitarlegg sinn á Víkurál, syðst á Vestfjarðamiðum, djúpt vestur af Kollsvík. Tvö rannsóknaskip Hafrannsóknastofnunar og sex fiskiskip frá útgerðum stefna síðan öll til lands og tvö þegar lögst að bryggju.

„Okkar skip ljúka við sitt í kvöld og sigla þá heim,“ segir Sigurður Guðjónsson, forstjóri Hafrannsóknastofnunar.

Núna taka við útreikningar á stærð loðnustofnsins út frá þeim viðbótarupplýsingum sem fengist hafa í leiðangrinum og segir Sigurður stefnt að því að ljúka þeim reikningum á þriðjudag.

Innan sjávarútvegsins eru vonir bundnar við það að leiðangurinn skili þeim árangri að unnt verði að auka loðnukvóta úr 61 þúsund tonnum og upp í jafnvel 200-300 þúsund tonn.

„Við vorum að sjá loðnu mjög víða við landgrunnsbrúnina,“ segir leiðangursstjórinn Birkir Bárðarson en telur þó ekki unnt að leggja mat á það á þessu stigi hvort tilefni verði til að hækka veiðiráðgjöfina.

Hlykkir sem sjást á leitarferlunum á vef Hafrannsóknastofnunar gefa hugmynd um hvar skipin voru að sjá loðnu. Hlykkirnir koma fram þar sem skipin setja út lítið troll og toga til að ná sýnum af loðnunni.

Leitarferlar og staðsetning skipanna á tíunda tímanum í kvöld. Hafísjaðarinn sést undan Vestfjörðum.Hafrannsóknastofnun

Á Grænlandssundi, sem hafís huldi í byrjun janúar, sá Árni Friðriksson aðallega ungloðnu sem ekki er hluti af hrygningarstofninum núna. Fullorðna loðnan var austar og á nokkuð hefðbundinni farleið, að sögn Birkis. Jóna Eðvalds SF, sem leitaði djúpt austur af landinu, sá hins vegar enga loðnu þar.

„Það sem er óvenjulegt miðað við undanfarin ár er hvað hún er snemma á ferðinni,“ segir Birkir. Þá sé loðnan farin að ganga inn á grunnslóð fyrir austan.

Birkir Bárðarson fiskifræðingur er leiðangursstjóri.Egill Aðalsteinsson

Hrognahlutfall í loðnunni hafi mælst milli fimm og níu prósent af þyngd hennar. Við hrygningu sé það milli tuttugu og þrjátíu prósent og segir Birkir stefna í að loðnan fari að hrygna um miðjan mars.

Hitt rannsóknaskipið, Bjarni Sæmundsson, var í kvöld statt norður af Hornströndum á heimleið til Hafnarfjarðar. Hákon ÞH var kominn inn til Akureyrar, Börkur NK var út af Héraðsflóa, Aðalsteinn Jónsson SU út af Glettingi, Ásgrímur Halldórsson SF stefndi inn á Norðfjörð, Bjarni Ólafsson AK var kominn inn til Norðfjarðar en Jóna Eðvalds SF var á siglingu um líklega gönguslóð loðnunnar undan sunnanverðum Austfjörðum.

Núverandi kvóti dugar vart nema í 1-2 veiðiferðir á hvert þeirra átján íslensku skipa sem búið er að úthluta kvóta. Af 61 þúsund tonnunum fá norsk skip bróðurpartinn vegna milliríkjasamninga en grænlensk og færeysk fá einnig hlut. Íslendingar fá hins vegar megnið af því sem bætist við umfram þetta.

Hér má sjá loðnuleitina skýrða í fréttum Stöðvar 2 fyrir helgi:

Sjávarútvegur Langanesbyggð Vopnafjörður Múlaþing Fjarðabyggð Hornafjörður Vestmannaeyjar Akranes Vísindi

Tengdar fréttir

Átta skip í ákafri loðnuleit: „Nú á hún ekki að sleppa“

Loðnuleitin sem hófst um síðustu helgi er orðin mun umfangsmeiri en áður var gert ráð fyrir. Í fyrstu var miðað við þrjú til fjögur skip en núna eru þau orðin átta talsins, tvö rannsóknarskip Hafrannsóknastofnunar og sex uppsjávarveiðiskip frá útgerðum; öll að leita loðnunnar.

Ráðherra fagnar að tekist hafi að afstýra loðnubresti

Kristján Þór Júlíusson, sjávarútvegs- og landbúnaðarráðherra, gerði á fundi ríkisstjórnarinnar í morgun grein fyrir því að hann hefði í samræmi við ráðgjöf Hafrannsóknastofnunar undirritað reglugerð um veiðar á loðnu.

Loðnustofninn metinn nægilega sterkur til að hefja loðnuveiðar

Loðnuveiðar íslenskra skipa geta hafist að nýju eftir tveggja ára hlé, samkvæmt nýju mati Hafrannsóknastofnunar á ástandi loðnustofnsins, sem birt var í dag, eftir mælingar á loðnutorfum sem fundust á Austfjarðamiðum um síðustu helgi. Stofnunin leggur til að veiðikvóti verði aukinn úr 22 þúsund tonnum upp í 54.200 tonn, sem dugar til að hægt verði að gefa út kvóta til íslenskra skipa.

Fyrsta loðnan veiðist á Íslandsmiðum í þrjú ár

Fyrsta loðnan sem veiðist á Íslandsmiðum í þrjú ár fékkst á Austfjarðamiðum í gærkvöldi þegar grænlenska skipið Polar Amaroq fékk milli tuttugu og þrjátíu tonn í einu kasti. Síldarvinnslan í Neskaupstað á þriðjungshlut í grænlensku útgerðinni en yfirmenn um borð eru íslenskir.



Mest lesið


Fleiri fréttir

Sjá meira


×

Mest lesið